Śledčyja orhany abnarodavali niekatoryja padrabiaznaści spravy ab sprobie ŭciokaŭ z suda Savieckaha rajona Minska 20 listapada minułaha hoda.
Jak paviedamiŭ aficyjny pradstaŭnik upraŭleńnia Śledčaha kamiteta pa Minsku Alaksandr Hierasimaŭ, inicyjatar uciokaŭ matyvavaŭ svaje dziejańni niervovym zryvam u suviazi ź niezadavolenaściu chodam sudovaha pracesu i, u pryvatnaści, niežadańniem być asudžanym na praciahły termin pazbaŭleńnia voli, pra jaki chadajničaŭ dziaržabvinavaŭca pierad sudom.
Pavodle infarmacyi śledstva, u rajonnym sudzie razhladałasia kryminalnaja sprava ab machlarstvie, učynienym hrupaj asob u asabliva bujnym pamiery. Paśla zakančeńnia sudovaha pasiadžeńnia dvoje bratoŭ 1979 i 1983 hadoŭ naradžeńnia, jakija prachodzili pa spravie ŭ jakaści abvinavačvanych, u kanvojnym pakoi akazali supraciŭ supracoŭnikam milicyi i sprabavali uciačy. Dziakujučy zładžanym dziejańniam kanvoju sproba ŭciokaŭ praduchilena.
Sprabujučy ŭciačy, starejšy brat skarystaŭsia frahmientam mietaličnaj truby, znojdzienaj u adnym z pamiaškańniaŭ ahulnaha karystańnia. Im jon nanios adnamu z kanvairaŭ ciažkija cialesnyja paškodžańni, ale supracoŭnik milicyi zdoleŭ abiasškodzić napadaŭšaha. Dva inšyja kanvairy prymianili śpiecyjalnyja srodki i fizičnuju siłu dla spynieńnia dziejańniaŭ złamyśnika i małodšaha brata, jaki sprabavaŭ akazać jamu sadziejničańnie. Pry hetym byli zroblenyja papieradžalnyja vystrały z tabielnaj zbroi. Traŭmiravany supracoŭnik milicyi byŭ špitalizavany, jamu akazana kvalifikavanaja miedycynskaja dapamoha.
Nahadajem, abvinavačvanyja — hramadzianie Kazachstana, žychary Ałmaty.
Starejšy ź fihurantaŭ abvinavačvajecca ŭ sprobie ŭciokaŭ z-pad varty, učynieny hrupaj asob z prymianieńniem nasilla (č. 1 art. 14 i č. 2 art. 413 KK) i zamachu na zabojstva supracoŭnika milicyi ŭ suviazi z vykanańniem im abaviazkaŭ pa achovie hramadskaha paradku (č. 1 art. 14 i art. 362 KK); małodšy — u sprobie uciokaŭ (č. 1 art. 14 i č. 2 art. 413 KK) i dapamahańni ŭ zamachu na zabojstva supracoŭnika milicyi (č. 6 art. 16, č. 1 art. 14 i art. 362 KK).
