Sud u Paŭnočnaj Irłandyi pryznaŭ uładalnikaŭ piakarni Ashers Baking Company vinavatymi ŭ dyskryminacyi leśbijanak, hiejaŭ, biseksuałaŭ i transhienderaŭ za admovu vyrabić tort z nadpisam u abaronu adnapołych šlubaŭ.
Pieršapačatkova kampanija pryniała zamovu hiej-aktyvista Hareta Li na vyrab torta z nadpisam «Padtrymajcie hiej-šluby», adnak paźniej admianiła jaje i prapanavała viarnuć hrošy. U adkaz Li źviarnuŭsia ŭ sud, abvinavaciŭšy piakarniu ŭ dyskryminacyi na padstavie seksualnaj aryjentacyi. U sakaviku na sudzie jon raspavioŭ, što admova piakarni prymusiła jaho adčuć siabie «ničoha nie vartym».
U adroźnieńnie ad inšych častak Złučanaha Karaleŭstva, u Paŭnočnaj Irłandyi adnapołyja šluby nie lehalizavanyja.
U rašeńni suda adznačajecca, što Ashers Baking Company «viadzie biznes dla atrymańnia prybytku» i nie źjaŭlajecca relihijnaj hrupaj, niahledziačy na toje, što ŭładalniki kampanii — chryścijanie.
Pa słovach sudździ, jon pryznaje, što supracoŭniki piakarni majuć «ščyryja i hłybokija» relihijnyja pohlady, adnak heta nie vyzvalaje ich ad dziejańnia zakona ab dyskryminacyi.
Advakaty bakoŭ zahadzia ŭzhadnili kampiensacyju ŭ 500 funtaŭ sterlinhaŭ (775 dalaraŭ), jakuju Li, pa słovach jaho advakata, maje namier achviaravać na dabračynnaść.
Pierad vyniasieńniem rašeńnia mieniedžer piakarni Denieł Makartur zajaviŭ: «My z radaściu absłuhoŭvajem usich, adnak my nie možam prasoŭvać toje, što supiarečyć słovam Biblii ab šlubie. My sprabujem kiravacca ŭ našych dziejańniach chryścijanskaj vieraj».
Namieśnik pieršaha ministra Paŭnočnaj Irłandyi ad partyi Šyn Fiejn Marcin Makhines pavitaŭ rašeńnie, zajaviŭšy, što heta «dobry vynik dla roŭnaści». U toj ža čas deputat ad kankurujučaj Demakratyčnaj junijanisckaj partyi Poł Hivan zajaviŭ, što rašeńnie sudździ ujaŭlaje saboj ataku na relihijnyja pierakanańni ludziej.
«Nielha mieć ijerarchiju pravoŭ, a tut vyznačajecca vyraznaja ijerarchija, jakaja praduhledžvaje, što pravy hiejaŭ važniejšyja za pravy ludziej na relihijnyja pierakanańni», — zajaviŭ Hivan.
