U ramkach Treciaha biznes-forumu «Ŭschodniaha partnerstva» pradstaŭniki ŭładaŭ Biełarusi i biełaruskija pradprymalniki pravodziać pieramovy z kalehami z Eŭraźviazu.
Jak paviedamiŭ Svabodzie aficyjny pradstaŭnik Biełarusi na forumie, pieršy namieśnik ministra ekanomiki Alaksandar Zabaroŭski, siońnia ŭ jaho ŭžo adbylisia sustrečy z pradstaŭnikami ŭradu Łatvii:
«Siońnia my vielmi aktyŭna papracavali z našymi łatvijskimi kalehami, siońnia cudoŭna prajšła sekcyja i pieršaja plenarnaja sesija forumu, siońnia my abmiarkoŭvali mahčymyja varyjanty raźvićcia finansavaha supracoŭnictva pamiž Biełaruśsiu i Eŭrapiejskim Źviazam. My taksama pahladzieli kirunak kankretnych prajektaŭ u halinie tranzytu, raźvićcia tranzytnych mahčymaściaŭ, jakija isnujuć u nas i jakija cikavyja dla prybałtyjskich dziaržaŭ. I siońnia vielmi važna, što my pierachodzim na supracoŭnictva, jakoje źjaŭlajecca kompleksnym i ŭzajemavyhadnym dla dvuch bakoŭ — dla Biełarusi, Łatvii i dla bolš šyrokaha koła krain, jakija ŭvachodziać u eŭrapiejskuju palityku partnerstva. U Biełarusi tut vielmi kankretnyja, jasnyja prahmatyčnyja intaresy, jakija my abaznačajem. Hetyja intaresy nakiravanyja na raźvićcio investycyjnaha supracoŭnictva, na kaaperacyju, i jany źjaŭlajucca maksymalna kankretnymi».
Spadar Zabaroŭski zajaviŭ, što ŭ adnosinach Biełarusi i Eŭraźviazu nazirajecca prahres:
«Amal padvoiŭsia lik supolnych prajektaŭ, pavialičyŭsia abjom uzajemnych investycyjaŭ u kirunkach Biełaruś — EZ, EZ — Biełaruś. I, niahledziačy na składanuju ekanamičnuju abstanoŭku ŭ Eŭropie, na ryzyki i doŭhaterminovyja vykliki, my razam z našymi eŭrapiejskimi kalehami šukajem varyjanty vyrašeńnia hetych pytańniaŭ. A biznes — heta samy hałoŭny drajver palapšeńnia adnosin i kankretnych vynikaŭ. I toje, što naša delehacyja tut adna z samych šmatlikich siarod usich krain partnerstva, pakazvaje, što jość kankretnyja realnyja prajekty, jakija dazvalajuć nam, umacoŭvajučy ekanamičnyja suviazi, dyversyfikavać i pastaŭki, i investycyjnaje, i finansavaje supracoŭnictva, takim čynam stvarajučy nieabchodnaje asiarodździe dla paśpiachovaści i biznesu, i dyjalohu na ŭzroŭni ŭradaŭ».
Na pytańnie žurnalistaŭ, ci nie pieraškadžajuć hetamu palityčnyja prablemy ŭ adnosinach z Eŭraźviazam, pieršy namieśnik ministra ekanomiki Biełarusi Alaksandar Zabaroŭski adkazaŭ:
«Pastanoŭka pytańnia pra vybar pamiž Zachadam i Ŭschodam, Bruselem ci Maskvoju, a taksama roznaha rodu štampy — nieprymalnyja. Na siońniašni dzień my bačym, što, kanstruktyŭna pracujučy z Eŭrapiejskim Źviazam, my hatovyja padvyšać efektyŭnaść našych adnosin, padvyšać efektyŭnaść doŭhaterminovaha supracoŭnictva pamiž Biełaruśsiu i Eŭrapiejskim Źviazam. Heta vielmi važny hałoŭny trend».
Adkazvajučy na pytańnie nakont raźvićcia pryvatyzacyi ŭ Biełarusi, spadar Zabaroŭski zajaviŭ, što na siońnia niama havorki pra maštabnuju kampaniju pryvatyzacyi ŭ krainie.
