Biełaruś pavinna vypracavać svaju pazicyju adnosna Kryma, zajaviŭ prezident Ukrainy Piotr Parašenka paśla prybyćcia na sustreču lidaraŭ Jeŭrapiejskaj narodnaj partyi 21 maja ŭ Ryzie.
Ukrainskaha lidara paprasili prakamientavać infarmacyju ab tym, što Biełaruś i Armienija admovilisia padpisać dekłaracyju samita Uschodniaha partniorstva z-za frazy ab niezakonnaj anieksii Kryma Rasijaj.
«Dumaju, što situacyja z anieksijaj Kryma źjaŭlajecca pryznanaj usim śvietam, — skazaŭ Parašenka. — Biełaruś pavinna vypracavać svaju pazicyju. Kali jana dastatkova nierašučaja, to heta prablema Biełarusi, a nie Jeŭrasajuza i Ukrainy».
Raniej pres-sakratar biełaruskaha MZS Dźmitryj Mirončyk patłumačyŭ, što Minsk vystupaje za niekanfrantacyjny charaktar Uschodniaha partniorstva z pazityŭnym paradkam dnia. «Praca nad tekstam dekłaracyi praciahvajecca. Što da pazicyi Biełarusi, to jana dobra viadomaja. My vystupajem za niekanfrantacyjny charaktar Uschodniaha partniorstva z pazityŭnym paradkam dnia, u tym liku i dla «susiedziaŭ susiedziaŭ», — zajaviŭ Mirončyk.
Samit Uschodniaha partniorstva pačniecca ŭ Ryzie siońnia ŭviečary niefarmalnaj viačeraj kiraŭnikoŭ delehacyj i praciahniecca 22 maja. Pa jaho vynikach płanujecca pryniaćcie sumiesnaj dekłaracyi. Biełaruś na samicie budzie pradstaŭlać ministr zamiežnych spraŭ Uładzimir Makiej.
Prajekt ES «Uschodniaje partniorstva» stvorany z metaj raźvićcia intehracyjnych suviaziej Jeŭrasajuza z šaściu krainami byłoha SSSR — Armienijaj, Azierbajdžanam, Biełaruśsiu, Hruzijaj, Małdovaj i Ukrainaj.
