34-hadovaja žančyna skardzicca, što paśla zvalnieńnia ź joj nie zmahli kančatkova raźličycca, paviedamlaje «Kamiersant».
Ludmiła Saŭčuk uładkavałasia na pracu ŭ kampaniju «Internet-daśledavańni» ŭ śniežni 2014 hoda.
«Praca była paźmiennaja, źmiena składała 12 hadzin. Usie supracoŭniki pavinny byli pisać peŭnuju kolkaść pastoŭ i kamientaroŭ na roznych sajtach», — havorycca ŭ iskavaj zajavie žančyny.
Pazoŭca pracavała ŭ adździele śpiecprajektaŭ. U zadačy padraździaleńnia ŭvachodziła pisać nie mienš za piać palityčnych pastoŭ na temy, jakija rassyłalisia ŭ pačatku kožnaha tydnia. Zarpłata składała 41 tys. rub. Pa słovach Saŭčuk, jana nie była aformlenaja aficyjna, a zarpłata vydavałasia najaŭnymi. Zvolnili jaje ŭ sakaviku hetaha hoda. Kiraŭnictva paviedamiła supracoŭnicy, što taja parušyła ŭmovy damovy, jaki zabaraniaje abmiarkoŭvać dziejnaść kampanii z trecimi asobami.
«Ja mieła znosiny z žurnalistami, jakija praciahvali vyśviatlać, što heta za kampanija, i ŭ vyniku była zvolnienaja. Pryčym ni zahadu, ni niejkich inšych papier ja nie bačyła», — raspaviała spadarynia Saŭčuk.
Juryst Darja Suchich, jakaja pradstaŭlaje intaresy paciarpiełaj, nie chavaje, što zvarot u sud na samaj spravie maje padvojnaje pryznačeńnie. «Sud — tolki padstava vyvieści hetuju dosyć zakrytuju arhanizacyju ŭ publičnaje pole. U chodzie pracesu buduć zapytany dakumienty, statut hetaj arhanizacyi», — skazała jana. Pa słovach Suchich, padčas razboru abarona źbirajecca vyklikać u sud inšych byłych supracoŭnikaŭ «Internet-daśledavańniaŭ» i kiraŭnictva kampanii.
Što cikava, sama Ludmiła Saŭčuk paśla zvalnieńnia vyrašyła zasnavać ruch «Infarmacyjny śviet», jaki budzie zmahacca suprać płatnych kamientataraŭ i internet-trolinhu.