Ministerstva finansaŭ Biełarusi apublikavała finansavyja spravazdačy adkrytych akcyjaniernych tavarystvaŭ krainy za 2014 hod. Aproč taho, infarmacyju pra svaju finansavuju situacyju pradastavili kampanii, jakija vypuskali ablihacyi. Narešcie, Nacbank publikuje spravazdačy bankaŭ krainy.
Na padstavie hetych źviestak «Naša Niva» skłała top-20 samych prybytkovych kampanij z adkrytaj spravazdačnaściu.
Dla zručnaści ŭsprymańnia ličbaŭ sumy pieraviedzienyja ŭ dalary pa letašnim siarednim kursie.
«Biełaruśkalij» znoŭ staŭ samaj prybytkovaj kampanijaj krainy. U 2013 hodzie praz skandał na kalijnym rynku salihorskaja kampanija adkaciłasia na treciaje miesca, adnak ciapier prybytak vyras u 4,5 razu.
Heta dazvoliła abyjści naftapierapracoŭčyja zavody ŭ Mazyry i Navapołacku. Darečy, ich vynik pracy taksama istotna palepšyŭsia za hod.
Bank raźvićcia Biełarusi na čale ź Siarhiejem Rumasam — ustanova praź jakuju prakačvajucca biudžetnyja hrošy na dziaržaŭnyja prahramy. Finansistu udajecca demanstravać dobryja ličby hod za hodam.
Uśled iduć adzin za adnym adrazu niekalki bankaŭ. Napieradzie dva dziaržaŭnyja, adnak i pryvatniki nie adstajuć. Faktyčna «Pryjorbank» možna ličyć samaj prybytkovaj kampanijaj z adkrytaj spravazdačnaściu.
Hetaje zvańnie musiŭ mieć «Jeŭrahandal» (handlovaja sietka «Jeŭraopt»). Za pieršyja try kvartały prybytak sietki kramaŭ pieravyšaŭ $125 miljonaŭ, pryčym ličby demanstravali pazityŭnuju tendencyju. Adnak u čaćviortym kvartale kampanija nie była emitentam ablihacyj, tamu i nie pradastaŭlała spravazdačnaść. Značycca, u śpisie jaje zusim niama.
Siarod pryvatnych kampanij, jakija prynieśli vialiki dachod svaim ułaśnikam, razhalinavanaja biznes-impieryja Juryja Čyža i małočnaja vytvorčaść Alaksandra Mašenskaha. Ichnija «Trajpł» i «Savuškaŭ pradukt» na dvaich zarabili bolš za $100 miljonaŭ.
| № | Kampanija | Prybytak |
| 1 | Biełaruśkalij | 696,8 |
| 2 | Mazyrski NPZ | 317,9 |
| 3 | Naftan | 193,2 |
| 4 | Bank raźvićcia Biełarusi | 163,2 |
| 5 | Biełarusbank | 162,9 |
| 6 | Biełahraprambank | 114,4 |
| 7 | Pryjorbank | 92,8 |
| 8 | BPS-Cbierbank | 88,7 |
| 9 | Biełhazprombank | 75,1 |
| 10 | Trajpł | 64,5 |
| 11 | Minskenierha | 58,2 |
| 12 | Hrodzienskaja tytuniovaja fabryka «Nioman» | 57,9 |
| 13 | Homieltransnafta Družba | 55,8 |
| 14 | Bank BiełVEB | 49,5 |
| 15 | Savuškaŭ pradukt | 40,8 |
| 16 | Viciebskenierha | 37,7 |
| 17 | Bielinviestbank | 36,3 |
| 18 | MAPID | 35 |
| 19 | Brestenierha | 33,2 |
| 20 | Homielenierha | 31,9 |
Ličby ŭkazanyja ŭ miljonach dalaraŭ.
Na advarotnym baku rejtynhu pramysłovyja hihanty. MAZ, MTZ i «Atłant» razam prynieśli katastrafičnyja $324 miljony čystych strataŭ.
Dla miljaniera Alaksandra Šakucina hod taksama skłaŭsia niaŭdała. Jahonaja kiraŭničaja kampanija chołdynha «Amkador» pryniesła $9,3 miljona čystych strataŭ.
Siarod pryvatnikaŭ horšaja situacyja tolki ŭ zamiežnaj «Maskoŭskaj inviestycyjnaj budaŭničaj kampanii» (-$10,6 miljona).
| № | Kampanija | Straty |
| 1 | MAZ | -153 |
| 2 | MTZ | -90,4 |
| 3 | Atłant | -80,6 |
| 4 | BMZ | -63,5 |
| 5 | Homsielmaš | -45,7 |
| 6 | Homielškło | -25,6 |
| 7 | BiełVitunifarm | -23,8 |
| 8 | Śvietłahorski CKK | -22 |
| 9 | Barysaŭski miasakambinat | -20,8 |
| 10 | Słucki syradzielny kambinat | -18,8 |
Ličby ŭkazanyja ŭ miljonach dalaraŭ.
