Tekst dakumentu, u asnovu jakoha pakładzieny prajekt kiroŭnaj parlamenckaj kaalicyi — chryścijanskich i sacyjał‑demakrataŭ, — nakiravany na razhlad u niamiecki ŭrad.
Jak zajaviła na ŭčorašnich debatach staršynia parlamenckaj hrupy pa Biełarusi, sacyjał‑demakratka Uta Capf, aŭtary prajektu chočuć «dać jak maha bolšaj kolkaści biełarusaŭ mahčymaść paznajomicca z Eŭropaj».
Tym časam raspracoŭščyki alternatyŭnaha prajektu ab vizach — siabry frakcyjaŭ «zialonych» i volnych demakrataŭ — ličać, što pa sutnaści sytuacyja z hetak zvanymi «lhotnikami» isnavała i raniej.
U svaim prajekcie apazycyja prapanoŭvała źnizić košt šenhienskich vizaŭ dla biełarusaŭ z 60 da 35 eŭra, a taksama pazbavić konsulskich zboraŭ usich biez vyklučeńnia pradstaŭnikoŭ ilhotnych katehoryjaŭ.
Jak zajaviła deputatka ad frakcyi «zialonych» Maryluiza Bek, ciapierašniaja sytuacyja nahadvaje «druhi bok medala berlinskaj ściany».
«Čamu inšaja kraina EZ —Francyja — moža vydavać biełarusam biaspłatnyja vizy, a Niamieččyna — nie? Ale ž pry hetym my chočam dyjalohu i padtrymki demakratyčnych siłaŭ», — skazała deputatka.
Maryluiza Bek nazvała «idyjockaj» lohiku EZ, jaki ŭ svoj čas nie pajšoŭ nasustrač prapanovam Miensku ab źnižeńni koštu šenhienskich vizaŭ. «Jany ličać, što karajuć režym, a nasamreč karajuć prostych ludziej».
U časie debataŭ adznačałasia, što ŭ 2006 hodzie EZ nakiravaŭ Miensku svaje prapanovy ab padtrymcy krainy ŭ ekanamičnaj i sacyjalnaj sferach. Ich pryniaćcio dało b Biełarusi vialikija šancy ŭ ramkach eŭrapiejskaj palityki dobrasusiedztva. Padobnaja padtrymka, adnak, uskładaje na Biełaruś peŭnyja abaviazki ŭ pytańniach praviadzieńnia reformaŭ, harantyjaŭ demakratyčnych pravoŭ i svabodaŭ dla hramadzian. Jak padkreślivali deputaty, va ŭmovach aŭtarytarnaha režymu nijakaja aktyŭnaść apazycyi niemahčymaja.
Taksama byli adznačanyja niekatoryja pazytyŭnyja kroki aficyjnaha Miensku. Razmova idzie pra vyzvaleńnie palitviaźniaŭ, adkryćcio pradstaŭnictva Eŭrakamisii ŭ Miensku, pryznačeńnie novaha ambasadara ABSE, majučuju adbycca sustreču biełaruskaha ministra Martynava ŭ niamieckim MZS.
Sacyjał‑demakratka Uta Capf vykazała spadziavańnie na toje, što nieŭzabavie buduć vyzvalenyja Alaksandar Kazulin i Andrej Klimaŭ. Pavodle jaje słovaŭ, «heta mahło b stać vielmi važnym krokam». Jak ličać niamieckija palityki, «sapraŭdnaj lakmusavaj papierkaj stanuć sioletnija parlamenckija vybary».
