Polskaja parłamienckaja delehacyja miełasia vylecieć z Varšavy ŭ Prahu na sustreču z češskimi kalehami. Na borcie znachodziłasia 18 čałaviek, u tym liku śpikier Siejmu Radasłaŭ Sikorski.
Jak paviedamlajuć polskija ŚMI, samalot paśla naboru chutkaści rezka zatarmaziŭ, ale zmoh zatrymacca na ŭźlotna-pasadačnaj pałasie. Pavodle śviedčańniaŭ pasažyraŭ, samalot paśpieŭ krychu adarvacca ad ziamli.
dziennik.pl
«Kapitan prainfarmavaŭ, što adbyŭsia zboj u navihacyjnaj sistemie. Paśla ja parazmaŭlaŭ ź piłotam asabista. U takich vypadkach treba spyniać start, kali heta mahčyma, i heta adbyłosia, dziakuj Bohu», — paviedamiŭ Sikorski.
Paśla śpikier polskaha parłamientu dadaŭ, što «kamiercyjnyja samaloty ŭ niekatorych adnosinach bolš biaśpiečnyja, bo piłoty kamiercyjnych avijalinij majuć mienšuju schilnaść da ryzyki, majuć bolš strohija pracedury. U vajennych ža jość žadańnie vykanać zadaču».
Pavodle avijacyjnaha ekśpierta Tomaša Hipkaha, ekipažu i pasažyram pašancavała, što samalot zmoh zatrymacca da kanca ŭźlotna-pasadačnaj pałasy, bo koły ŭžo adarvalisia ad ziamli. Zvyčajna ŭ takich vypadkach heta nie atrymlivajecca zrabić. «Heta najbolš niebiaśpiečnaja faza ŭźlotu», — dadaje ekśpiert.
Palot mieŭ adbyvacca na samalocie Embraer 170, jaki arandujecca ŭradam u nacyjanalnaj kampanii LOT.