U Švecyju pryjechała delehacyja ad «Husarskaj charuhvy Jana Kazłoŭskaha», maršałka pamorskaha vajavodztva. Uznačalvaje delehacyju paručnik Jarasłaŭ Stručyński. U zali karaleŭskaha arsenału delehaty ŭračysta abviaścili pasłańnie da jaho karaleŭskaj vialikaści, Karła XVI, z prośbaj viarnuć častku polskich trafejaŭ, jakija byli vyviezienyja švedami padčas vajny z Rečču Paspalitaj u siaredzinie XVI st.
Husarskaja charuhva — histaryčny klub, jaki ładzić rekanstrukcyju histaryčnych batalijaŭ Polščy i Rečy Paspalitaj. Nahodaj da pajezdki pradstaŭnikoŭ charuhvy ŭ Švecyju stała vystava ŭ Stakholmskim karaleŭskim arsenale «Vajennyja trafei», dzie byli vystaŭlenyja kaštoŭnaści i mastackija tvory. Hetyja trafei byli zdabytyja švedami ŭ 17‑18 stahodździach padčas šmatlikich vojnaŭ z Čechijaj, Danijaj, Narvehijaj, Rečču Paspalitaj i Rasiejaj. Siarod kaštoŭnaściaŭ fihurujuć kniha z paznačeńniami Mikałaja Kapiernika, roh apošniaha biełaruskaha tura ŭ srebnaj apravie, šerah kaštoŭnych ikonaŭ i čašaŭ z polskich i biełaruskich kaściołaŭ.
Niahledziačy na «pahrozu» rekanstruktaraŭ «vysadzicca i raźbić švedaŭ», ichniaja prośba maje mała šancaŭ na pośpiech. Adnak tema viartańnia kaštoŭnaściaŭ moža stać hałoŭnaj na kanferencyi, prymierkavanaj da vystavy.
