Inicyjatyva praviadzieńnia prezidenckich vybaraŭ 11 kastryčnika naležyć kiraŭniku Centrvybarkama Lidzii Jarmošynaj.
Pra heta jana zajaviła ŭviečary 14 červienia ŭ intervju prahramie «Kontury» telekanała ANT.
«Heta była maja inicyjatyva i maja prapanova», — skazała jana.
«Hetaja data apraŭdanaja, bo nie pryjdziecca źbirać pazačarhovuju siesiju parłamienta. Parłamient, pracujučy ciapier, da svajho sychodu na vakacyi moža abviaścić hetu vybarčuju kampaniju. CVK budzie źviartacca ŭ parłamient, kab heta adbyłosia 30 červienia. Hety dzień možna budzie ličyć pačatkam vybarčaj kampanii», — patłumačyła kiraŭnik CVK.
Bolš apraŭdanaj dataj 11 kastryčnika možna ličyć i z punktu hledžańnia druhoha turu vybaraŭ.
Jak udakładniła Lidzija Jarmošyna, u hetym vypadku kampanija nie parušyć kanstytucyjnyja terminy i zavieršycca ŭ miežach tych samych dvuch miesiacaŭ da zakančeńnia paŭnamoctvaŭ prezidenta.
«My ničoha nie pieranosili, bo data vybaraŭ nikim nie naznačałasia, nie nazyvalisia kančatkova. Prosta nieadnarazova ŭ roznych intervju ja kazała pra toje, što vybary pavinny prajści nie paźniej za 15 listapada — heta krajniaja data, za jakuju nielha vychodzić».
Čarhovyja prezidenckija vybary pavinny prajści ŭ Biełarusi nie paźniej za 21 listapada. Raniej u jakaści najbolš vierahodnaj daty ich praviadzieńnia nazyvałasia 15 listapada, mienavita hetuju datu ahučvała Jarmošyna miesiac tamu.