U Łos-Andžełasie praciahvajecca suśvietnaja vystava-kanfierencyja E3. U pieršy jaje dzień pakazali sikveły kłasičnych hulniaŭ Doom i Fallout. Nastupny dzień byŭ jašče bolš nasyčany anonsami. «Naša Niva» abrała 30 najbolš cikavych.
Techničnaje dema, na asnovie jakoha, mahčyma, budzie zroblenaja Robinson: The Journey
Pačać varta z taho, što my bačyli ŭ fantastyčnych filmach 80-90-ch hadoŭ: hulnia ŭ realistyčnaj virtualnaj realnaści. Stvaralniki Crysis anansavali Robinson: The Journey dla šlemaŭ virtualnaj realnaści nienazvanych madelaŭ (mahčyma, Oculus Rift ci Hololens). U joj chłopiec musić vyžyvać na dalokaj płaniecie, nasielenaj dynazaŭrami.
«Šalony Maks» u pieršyja dni vieraśnia sydzie ź vialikich ekranaŭ kinateatraŭ na mienšyja ekrany, da jakich padłučanyja Xbox One, Playstation 4 ci kampjutary na Windows i Linux. Hulnia Mad Max nie budzie naŭprost źviazanaja ź siužetam filmaŭ.
Treciaja častka sieryi nadzvyčaj składanych i niervovych hulniaŭ Dark Souls vyjdzie ŭ pačatku 2016 hoda dla PC, Xbox One i PS4. Dziasiatak kłasaŭ piersanažaŭ, mnostva novych vorahaŭ i cełaja hadzina siužetnych scen. Nu i (tradycyjna) sapsavanyja niervy.
Praciahnuć mučyć i Łaru Kroft, jakoj mocna dastałosia ŭ pieršaj častcy pierazapusku kłasičnaj sieryi. U nastupnaj častcy, Rise of the Tomb Raider, prynamsi časova ekskluziŭnaj dla Xbox One, na jaje abrynucca śniežnyja zaviei i ledzianyja hłyby. Jana tym časam budzie šukać darohu da čarhovaj Šambały. Kali mienavita vyjdzie hulnia, pakul nie viadoma.
U kancy 2016 hoda dla Xbox vyjdzie jašče adzin praciah kłasičnaj sieryi Gears of War: Gears 4 (biez «of War»). Usio tradycyjna: zdaraviennyja futurystyčnyja vajary i jašče bolš zdaraviennyja monstry. Tolki čamu tak ciomna?
Narešcie novaje imia — Recore. Tolki dla Xbox, zatoje ad stvaralnika Metroid Prime. Što viadoma pakul: budzie pustelnia, dziaŭčyna i robat, budzie heta ŭvosień 2016 hoda.
I jašče troški pra ekskluzivy dla Xbox One: Halo 5: Guardians vyjdzie 27 kastryčnika. Hulać treba budzie jak za tradycyjnaha hieroja sieryi Majstra Čyfa, tak i za Łoka, jaki na jaho paluje. U multypłejery źjavicca režym Warzone dla kamand pa 12 čałaviek.
Forza Motorsport 6 tradycyjna abiacaje niejmavierna realistyčnyja aŭtahonki. Kažuć, budzie paŭtysiačy mašyn i 26 roznych haradoŭ, 60 FPS pry 1080p. Vyjdzie hulnia 15 vieraśnia, znoŭ ža tolki dla Xbox One.
Mienš realistyčnyja, ale nie mienš jaskravyja honki Need for Speed vyjduć troški paźniej: 3 listapada. Zatoje na kansolach Xbox One i PS4, a taksama na piersanalnych kampjutarach. Abiacajuć maštabny pierazapusk (krychu zahłochłaj za apošni čas) sieryi ŭ duchu Underground 2.
Kali vam zdavałasia, što ŭ Mass Effect 3 vy natvaryli takoje, paśla čaho čas zakryvać sieryju, vy byli častkova pravy: novaja častka nie atrymała ličbu 4. Mass Effect: Andromeda maje stać pierazapuskam sieryi kaśmičnych rolevych hulniaŭ. Abnoŭleny śviet praz šmat hod paśla aryhinalnaj historyi, ale staraja (lubimaja ci nienavisnaja) mašynka. Čakać novy Mass Effect treba pad kaniec 2016 hoda.
Jašče adna novaja nazva, jakuju varta zapomnić, — Sea of Thieves. Pa-sapraŭdnamu akunucca ŭ śviet pirataŭ nie davodziłasia až z časoŭ Assassin's Creed: Black Flag. Daviadziecca ŭzimu 2016 hoda na PC i Xbox, pryčym u śviet jaskravy i mulciašny, stvorany aŭtarami kłasičnaj Battletoads.
I jašče troški mulciašnaści: stralałka Plants vs. Zombies Garden Warfare atrymaje praciah. Bolš brutalnych raślin, bolš zombi, bolš ściobu, kaapieratyŭny režym. Viasna-2016, PC, PS4 i Xbox One.
Mirror's Edge Catalyst narešcie daść mahčymaść viarnucca ŭ śviet futurystyčnaha tatalitaryzmu i parkuru ŭ vykanańni pryhažuni Fejt. Nie pytajcie, čamu, ale vychad doŭhačakanaha praciahu Mirror's Edge vyjdzie (dla kansolej i kampjutaraŭ) na Dzień abaroncy Ajčyny — 23 lutaha 2016 hoda. Mirror's Edge Catalyst.
A viarnucca ŭ śviet «Zornych Vojnaŭ» daduć 17 listapada hetaha hodu ŭ Star Wars Battlefront. Jana vyjdzie dla kansolej i PC, budzie mieć nie tolki maštabny multypłejer, ale i supolnaje prachodžańnie misij ź siabrami na adnym ekranie.
U chutkim časie vyjduć adrazu try hulni pa scenary piśmieńnika-militarysta Toma Kłensi. Pieršaja, Tom Clancy's The Division vyjdzie 8 sakavika 2016 hoda, ale ŭžo ŭ hetym hodzie zapuścicca beta-test na kansolach i kampjutarach. Hulnia spałučyć žanry «stralałki» i MMO RPG u śviecie, atakavanym bijaterarystami.
Druhaja, Tom Clancy's Ghost Recon Wildlands, pakul nie maje daty vychadu (viadoma, što vyjdzie na kansolach i PC). Jak i ŭ papiarednich Ghost Recon, hulec trapić u kamandu śpiecnazu, što vykonvaje samyja niebiaśpiečnyja misii pa ŭsim śviecie — i vykonvaje jak pa-cichamu, tak i atakaj «u łob». Što niezvyčajna dla žanru, abiacajuć adkryty śviet.
Narešcie, Tom Clancy's Rainbow Six: Siegetaksama raspaviadzie praśpiecnaz, ale ŭ bolš realistyčnym taktyčnym režymie i pieravažna ŭ zakrytych pamiaškańniach. Hulnia vyjdzie dla PC, Xbox One i PS4 13 kastryčnika. Što dziŭna dla simulataru śpiecnazu, tam navat abiacajuć siužet.
Ubisoft, viadoma, čarhovy raz skarystajecca nazvaj Assassin's Creed. Ciapier chałodnuju vajnu chašašynaŭ i tamplijeraŭ pieraniasuć u viktaryjanskuju Anhliju. Assassin's Creed Syndicate vyjdzie dla kansolej i kampjutaraŭ 23 kastryčnika. Jak stała viadoma, daduć zładzić «GTA na karetach» i pabicca na dachu ciahnika, a taksama prykinucca Čałaviekam-pavukom.
Ale Ubisoft zdolnaja nie tolki vykarystoŭvać staryja nazvy, ale i prydumlać novyja. Nie samy lepšy zapusk Watch Dogs u minułym hodzie ich nie spužaŭ: kampanija sioleta pradstaviła jašče adno novaje imia — For Honor. Pra hulniu viadoma niašmat: upor budzie na chałodnuju zbroju i kaapieratyŭnyja bitvy, bajavaja sistema abiacaje być raźvitaj i niaprostaj.
I jašče pra miačy i «biez padrabiaznaściej»: Fable Legends kali-niebudź u 2015 hodzie vyjdzie dla Xbox One i PC.Jana budzie biaspłatnaj, z adzinočnaj hulnioj, kaapieratyvam i multypłejeram.
Epičnyja i cyničnyja pryhody ŭ miastečku Saŭt Park praciahnucca ŭ nastupnym hodzie na kampjutarach i kansolach. South Park: The Fractured but Whole pradstavili sami stvaralniki słavutaha multseryjału. Nas znoŭ čakaje mulciašnaja rolevaja hulnia, ale rabić jaje budzie ŭžo nie taja kamanda z Obsidian, što rabiła niadaŭniuju Stick of Truth, a studyja Ubisoft San Francisco.
Sieryja ŭdałych horadabudaŭničych stratehij Anno vyjdzie ŭ kosmas: Anno 2205 varta čakać na piersanalnych kampjutarach 3 listapada.
The Last Guardian, jakuju niechta čakaŭ, ale bolšaść stamiłasia čakać za 8 hod z anonsu, narešcie vyjdzie ŭ 2016 hodzie dla Playstation 4. Biezymiennaha chłopčyka pryjdziecca vyvodzić z ahromnistaha zamka z dapamohaj hryfona Tryko. Z apošnim pryjdziecca spačatku pa-sapraŭdnamu pasiabravać.
Jašče adzin ekskluziŭ dla Sony Playstation 4 — Horizon Zero Dawn, u jakim plamionam ździčełych ludziej pryjdziecca bicca sa źvieramašynami ŭ vializnym (padobna, što i adkrytym) śviecie. Kali vyjdzie novaja hulnia ad aŭtaraŭ Killzone, pakul nie kažuć dakładna: niedzie ŭ 2016-m.
Znoŭ ža tolki na Playstatiob daduć pahulać u Uncharted 4: A Thief's End. Uviesnu 2016 hoda słavuty vor praciahnie pryhody nie tolki na svaich dvaich, ale i (prynamsi ŭ adnoj misii) na čatyroch kołach.
A słavuty zabojca pad numaram 47 vierniecca 8 śniežnia ŭ novaj častcy Hitman. Ci budzie hulnia ekskluziŭnaj dla PS4, nieviadoma. Zatoje viadoma, što jana budzie vypuskacca ŭ farmacie epizodaŭ i razrasacca ź ciaham času.
Aŭtary LittleBigPlanet abiacajuć navučyć nas kanstruktavać sny ŭ Dream. Pakul ciažka skazać niešta nie tolki pra datu vychadu, ale i pra mahčymy žanr takoj hulni.
Square Enix abiacaje paradavać hiejmieraŭ (najpierš uładalnikaŭ PS4) paŭnavartasnym remejkam siomaj častki kultavaj sieryi Final Fantasy. Kali — nie skazali.
Jašče pra japoncaŭ: Ju Sudzuki za rekordna karotki čas sabraŭ miljon dalaraŭ. Stolki jamu achviaravali na Kickstarter praz hadzinu paśla anonsu Shenmue 3. Usiaho na adradžeńnie lubimaj japoncami RPG u adkrytym śviecie treba 2 młn dalaraŭ, hetaja suma na momant publikacyi praktyčna sabranaja. Hulnia maje vyjści dla PC i PS 4.
Narešcie, na kanfierencyi było pakazanaje novaje videa fantastyčnaj pa siužecie i maštabach No Man's Sky. Hihancki śviet hetkaha «Spore hałaktyčnych maštabaŭ z elemientami Elite» nie budzie pustym: na mnohich płanietach možna budzie pabačyć karysnyja resursy, zahadkavyja technałohii dy niezvyčajnuju fłoru i faŭnu. Vychad hulni dla PC i PS4 pryznačany na 2015 hod.
