U vieraśni 2014 h. handbalist SKA i zbornaj Biełarusi Raman Łukašuk atrymaŭ surjoznyja paškodžańni niedaloka ad uvachodu ŭ načny kłub i praz tydzień pamior. Upraŭleńnie Śledčaha kamiteta pa Minsku apublikavała infarmacyju, što hulec, vychodziačy z načnoha kłuba, pasvaryŭsia z raniej nieznajomym jamu mužčynam z nahody čarhovaści pasadki ŭ taksi. Padčas kanfliktu handbalist ŭpaŭ ad atrymanaha ŭdaru apanienta.
Hetaja viersija bieź jakich-niebudź źmianieńniaŭ prajšła šlach ad papiaredniaha rasśledavańnia da vyniasieńnia prysudu: abvinavačanamu Maksimu Urubuchavu 1988 h.n. za ŭčynienaje złačynstva sud pryznačyŭ pakarańnie ŭ vyhladzie pazbaŭleńnia voli terminam na 6 hadoŭ.
Adnak u prysudzie prysutničaje i alternatyŭny punkt hledžańnia. Baćka zahinułaha spartsmiena Alaksandr Łukašuk «miarkuje, što syn byŭ zabity 7 vieraśnia 2014 kala kaviarni «Mulen Ruž», i pryčynaj zabojstva źjaŭlałasia jaho prafiesijnaja dziejnaść, baraćba za miesca ŭ nacyjanalnaj zbornaj pa handbole, status adnaho z samych pierśpiektyŭnych hulcoŭ krainy. Tamu vinavatym u śmierci syna źjaŭlajecca nie Urubuchaŭ, a inšaja asoba, i jon nie moh pryčynić synu cialesnyja paškodžańni, śledstva praviedziena nie ŭ poŭnym abjomie. Urubuchaŭ padlahaje apraŭdańniu».
Z padobnaj zajavaj Łukašuk-starejšy źviarnuŭsia ŭ redakcyju «BiełHaziety». Jon pierakanany, što pryčyna śmierci Ramana — nie sprečka za mašynu taksi, jakuju, miž inšym, nie ŭdałosia znajści: usia sprava ŭ zajzdraści. Maŭlaŭ, paśla razvału minskaha «Dynama» kankurencyja na ŭnutranaj arenie abvastryłasia, i daloka nie ŭsim padabałasia vyžyvać u ciažkich umovach.
Alaksandr Łukašuk naličyŭ čatyroch handbalistaŭ, jakija ŭ noč śmierci Ramana znachodzilisia kala złaščasnaha načnoha kłuba. Pazicyja baćki budujecca vyklučna na videazapisy z kamier nazirańnia. Jon upeŭnieny: toje, što ŭbačyli jaho vočy, kardynalna razychodzicca sa śviedkami i aficyjnaj viersijaj.
Ciapier čytajuć
Dźmitryja Łukašenki nie było z baćkam i bratami na adznačeńni 3 Lipienia17
Kamientary