U biełaruskim futbole razharajecca čarhovy skandał. Na hety raz havorka moža iści pra dahavorny matč u vyšejšaj lizie čempijanatu Biełarusi. Jość padazreńni ŭ nie vielmi sumlennym charaktary hulni 10 turu pamiž žodzinskim «Tarpieda-BiełAZ» i FK «Minsk», jakaja adbyłasia 17 červienia ŭ Žodzinie.
Sprava ŭ tym, što za dzień da matču adna z supołak sacsietki «UKantakcie», jakaja zajmajecca prodažam infarmacyi pra dahavornyja matčy, apublikavała anons na matč pamiž «Tarpieda-BiełAZ» i «Minskam» (voś tut – apisańnie situacyi z usimi skrynšotami). Pisałasia, što jość dadzienyja pra zychod matča i jaho dakładny vynik. Byli prykładzienyja fatahrafii čekaŭ. Takija prahnozy nabyvajuć ludzi, jakija imknucca zarabić hrošy, pastaviŭšy ich u bukmiekierskich kantorach na peŭny zychod matču ci navat dakładny jaho vynik.
Na nastupny dzień paśla hulni byli vykładzienyja raznastajnyja paćvierdžańni vialikich stavak z boku administrataraŭ supołki, jakija akazalisia vyjhryšnymi. Matč skončyŭsia, jak i pradkazvali ŭ supołcy, ź likam 2:0 na karyść žodzinskaj kamandy. Varta adznačyć, što druhi hoł u varoty minčukoŭ byŭ zabity ź pienalci. Kaeficyjent na lik 2:0 dachodziŭ da 10, tamu možna było atrymać davoli dobry prybytak u vypadku padobnaj staŭki. Administratar supołki zrabiŭ videa, jakoje pakazvaje sapraŭdnaść zroblenych stavak i atrymanych vyjhryšaŭ.
Jak paviedamlajuć karystalniki internetu, kaeficyjent na pieramohu «Tarpieda-BiełAZ» značna źniziŭsia jašče pierad pačatkam hulni, a niekatoryja bukmiekierskija kantory źniali hety matč sa svaich linij. Pakul nijakich kamientaroŭ ad kiraŭnictva futbolnych kłubaŭ i Biełaruskaj fiederacyi futbołu na hety kont nie pastupała.
