Bžezinski prapanuje dla Ukrainy šlach Finlandyi — supakoić RF

Amierykanski palitołah Źbihnieŭ Bžezinski vystupaje za pastaŭki abarončaj zbroi Ukrainie i jaje nabližeńnie da Jeŭropy takim šlacham, jak u Finlandyi, — kab nie razdražniać Rasieju.

Pra heta jon skazaŭ u intervju vydańniu Spiegel Online, paviedamlaje DW.

Bžezinski adznačyŭ, što Rasija i ZŠA ŭžo daŭno znachodziacca ŭ stanie «chałodnaj vajny», adnak małavierahodna, što jana pieratvorycca ŭ «haračy kanflikt».

Novaja «chałodnaja vajna» nie budzie doŭžycca doŭha, bo padziei ŭ sučasnym śviecie raźvivajucca značna chutčej, čym kaliści, ličyć analityk.

Na pytańnie, ci pravilna dziejničajuć Złučanyja Štaty, płanujučy ŭ adkaz na vierahodnuju pahrozu ŭvarvańnia Rasii raźmiaścić u krainach Uschodniaj Jeŭropy i Bałtyi ciažkuju vajennuju techniku, Bžezinski adkazaŭ, što havorka idzie pra «dziejańni i reakcyi».

«Ja nie chaču nijakaj vajny, ale ja nie hatovy dać siabie zapałochać śćviardžeńniem, što my pravakujem vajnu simietryčnaj reakcyjaj. Naadvarot: kali my nie budziem reahavać, to heta vierny šlach dasiahnuć vajny», — ličyć ekśpiert.

Kali rasiejskija sałdaty ŭvojduć u krainy Bałtyi, NATA abaviazkova hetamu budzie procidziejničać, upeŭnieny Bžezinski.

«Dla taho NATA tam i jość, ci nie tak? Kali my ŭsim na śviecie budziem raspaviadać, što nie majem na ŭvazie toje, što havorym, i ničoha nie budziem rabić, kali nam niešta pryčyniajuć, to vy možacie paviesić letam na svoj dom tabličku «My nie doma, dźviery nie začynienyja». Ci ličycie vy heta razumnaj stratehijaj biaśpieki?», — pryvioŭ anałohiju ekśpiert.

Havoračy pra vyrašeńnie ŭkraina-rasijskaha kanfliktu, Bžezinski vystupiŭ za pradastaŭleńnie Ukrainie zbroi Zachadam.

«Było b metazhodna pradastavić Ukrainie abarončuju zbroju dla abarony vialikich haradoŭ, naprykład, procitankavaje ŭzbrajeńnie abo minamioty, tamu što my pavinny b pavysić canu rasijskaha hvałtu. Zachapić horad, nasielnictva jakoha nastrojenaje na abaronu, patrabuje nadzvyčaj vialikich vydatkaŭ», — arhumientavaŭ jon.

Vyrašeńnie kanfliktu pamiž Ukrainaj i Rasijaj moža adbycca pa finskim scenary, ličyć Bžezinski.

«Ukraina pavinna mieć prava svabodna vybirać svaju palityčnuju identyčnaść i bolš źviazvacca ź Jeŭropaj. Razam z tym Rasiju treba zapeŭnić, što Ukrainu nie voźmuć u NATA. Heta formuła rašeńnia kanfliktu», — prapanoŭvaje jon.

U razmovie ź niamieckimi žurnalistami ekśpiert taksama pazityŭna acaniŭ namahańni kanclera Anhieły Mierkiel dla vyrašeńnia ŭkraina-rasijskaha kanfliktu.

«Mierkiel robić vielmi dobruju pracu. A ŭ Abamy jość inšyja prablemy, naprykład, na Blizkim Uschodzie», — tak jon prakamientavaŭ mierkavańnie žurnalistaŭ, što prezident ZŠA faktyčna pieradaŭ kancleru viadučuju rolu va ŭrehulavańni «ŭkrainskaha kryzisu».

***

Źbihnieŭ Bžezinski byŭ daradcam pa pytańniach nacyjanalnaj biaśpieki ŭ administracyi prezidenta ZŠA Džyma Kartera (1977-1981 hady).

• 0
• 0
• 0
• 0
• 0