Jon (na fota ministr finansaŭ Hiermanii Volfhanh Šojble) piać hadoŭ piŭ vašu kroŭ, skažycie jamu «nie», zaklikaje hety płakat.
Refierendum u Hrecyi [5 lipienia], navat kali jaho ŭdzielniki skažuć «nie», nie dapamoža ŭradu ŭ Afinach znajści lohki vychad z kryzisu, zajaviŭ kiraŭnik Jeŭrahrupy (hrupa ministraŭ finansaŭ krain jeŭrazony) Jerun Dejsiełbłum.
Heta papiaredžańnie prahučała paśla taho, jak premjer-ministr Hrecyi Aleksis Cypras zajaviŭ, što «nie» na refierendumie dapamoža damahčysia lepšych umoŭ na pieramovach z kredytorami.
Jerun Dejsiełbłum skazaŭ, što heta takaja zdahadka «prosta niapravilnaja».
Dejsiełbłum, jaki źjaŭlajecca taksama ministram finansaŭ Niderłandaŭ, zajaviŭ, vystupajučy na pasiadžeńni parłamienckaha kamiteta ŭ Amsterdamie, što kali hreki adkinuty na hetym śpiecham arhanizavanym refierendumie jeŭrapiejskija ŭmovy kredytavańnia, bakam budzie ciažka pieraadoleć, pa jaho vyznačeńni, «fundamientalnyja roznahałośsi».
Taki vynik refierendumu pastavić i Hrecyju, i Jeŭrasajuz u vielmi składanuju situacyju, dadaŭ Jerun Dejsiełbłum.
«Hrečaski ŭrad adchilaje ŭsio, miarkujučy, što kali vy prahałasujecie «nie», vy atrymajecie lepšyja ci mienš žorstkija ŭmovy abo, bolš «družalubny» pakiet prapanoŭ. Hetaja zdahadka prosta niapravilnaja», — zajaviŭ kiraŭnik Jeŭrahrupy.
Hrečaskija banki pa-raniejšamu nie pracujuć, paśla taho jak u paniadziełak Jeŭrapiejski centrabank zamaroziŭ im finansavańnie.
Adkrylisia tolki niekatoryja adździaleńni, dla taho kab dazvolić piensijanieram zdymać sa svaich rachunkaŭ da 120 jeŭra ŭ tydzień. Mnohija piensijaniery ŭ Hrecyi nie karystajucca elektronnymi bankaŭskimi kartami.
U bankamatach zaraz hreki mohuć źniać maksimum 60 jeŭra ŭ dzień.
Miascovyja ŚMI pišuć pra toje, što situacyja stanovicca ŭsio bolš składanaj dla biźniesu, mnohija kampanii spyniajuć vytvorčaść, bo nie mohuć raspłacicca z pastaŭščykami.
Niekatoryja kramy źbirajucca adpravić svaich rabotnikaŭ u nieapłatny adpačynak.
Prablemy z drachmaj
Hrecyja nie moža viarnucca da druku drachmaŭ, bo ŭ krainie bolš niama adpaviednych drukavanych stankoŭ, zajaviŭ ministr finansaŭ krainy Janis Varufakis.
Jak rastłumačyŭ čynoŭnik, u 2000 hodzie, kali Hrecyja ŭstupiła ŭ jeŭrazonu, ułady krainy paśpiašalisia pazbavicca ad stankoŭ dla drukavańnia drachmaŭ, bo byli ŭpeŭnienyja, što ciapier u krainie zaŭsiody budzie ŭ abarocie adzinaja jeŭrapiejskaja valuta.
