Hruzija praź Jeŭrapiejski sud pa pravach čałavieka (JESPČ) zapatrabavała ad Rasii kampiensacyju ŭ pamiery 70,32 młn jeŭra za masavuju departacyju hruzinaŭ u 2006 hodzie.
U hruzinskim miniuście paviedamili, što pry vyznačeńni sumy patrabavanaj kampiensacyi jany zychodzili z precedentnych rašeńniaŭ JESPČ pa padobnych spravach.
U lipieni 2014 JESPČ znajšoŭ parušeńni niekalkich artykułaŭ Jeŭrapiejskaj kanviencyi pa pravach čałavieka z boku Rasii. Na vyznačeńnie sumy kampiensacyi JESPČ daŭ bakam hod, adnak, pavodle śćviardžeńniaŭ hruzinskaha miniusta, z Rasii adkaz tak i nie pastupiŭ.
U 2006 hodzie paśla aryštu ŭ Hruzii niekalkich supracoŭnikaŭ rasijskaha hałoŭnaha raźviedvalnaha ŭpraŭleńnia pa abvinavačvańni ŭ špijanažy Rasija pačała vysyłać hramadzian Hruzii, jakija znachodziacca na terytoryi RF bieź viz.
Pavodle dadzienych miniusta Hruzii, tady byli departavanyja bolš za 4,5 tysiač čałaviek.
U pazovie, padadzienym u sud u Strasburhu, śćviardžałasia, što paśla masavych zatrymańniaŭ i aryštaŭ pa mienšaj miery 2380 hramadzian Hruzii ŭtrymlivalisia ŭ kiepskich umovach.
Rasijski bok admaŭlaje abvinavačvańni ŭ parušeńni pravoŭ etničnych hruzinaŭ, zajaŭlajučy, što rabilisia zachady dla praduchileńnia nielehalnaj mihracyi.
