Miarkujecca, što ŭ 2016—2020 hadach uzrovień kampiensacyi nasielnictvam koštu žyllova-kamunalnych pasłuh budzie pavyšacca štohod.
Pavodle infarmacyi BiełaPAN, takija prapanovy razhladajucca ŭ miežach padrychtoŭki prahramy sacyjalna-ekanamičnaha raźvićcia krainy na bližejšyja piać hadoŭ, jakaja pavinna być zaćvierdžana sioleta na Usiebiełaruskim narodnym schodzie.
Pavodle acenak ekanamičnych uład, u 2015 hodzie taryfy nasielnictva pakryjuć prykładna tracinu zatrat, źviazanych z akazańniem žyllova-kamunalnych pasłuh. U pieryjad z 2016 hoda pa 2018-y štohod uzrovień kampiensacyi nasielnictvam zatrat na akazańnie takich pasłuh budzie pavyšacca prykładna na 10% i dasiahnie 62,5% u kancy 2018-ha.
Praduhledžvajecca, što ŭ 2018 hodzie nasielnictva budzie poŭnaściu pakryvać košt usich žyllova-kamunalnych pasłuh za vyklučeńniem ciepłazabieśpiačeńnia.
Pa ciepłavoj enierhii (aciapleńnie i haračaje vodazabieśpiačeńnie) akupnaść zatrat nasielnictvam płanujecca davieści ŭ 2020 hodzie da 30%, što prykładna ŭdvaja vyšej za ciapierašni ŭzrovień.
Razam z rostam taryfaŭ na žyllova-kamunalnyja pasłuhi ŭ novaj piacihodcy płanujecca i rost taryfaŭ na transpartnyja pasłuhi. Miarkujecca, što ŭzrovień kampiensacyi nasielnictvam zatrat na pasažyrskija pieravozki ŭ Minsku vyraście ź ciapierašnich 50% da 75% u 2020 hodzie.
Na likvidacyi biudžetnaha i pierakryžavanaha subsidavańnia nastojvajuć mižnarodnyja finansavyja arhanizacyi, da jakich Biełaruś źviarnułasia pa novyja kredyty. Jany ličać nieprymalnaj ciapierašniuju praktyku, kali bolš nizkija taryfy na płatnyja pasłuhi dla nasielnictva zabiaśpiečvajuć za košt ustanaŭleńnia bolš vysokich taryfaŭ dla pradpryjemstvaŭ i subsidyj biudžetu.
Pavodle acenak ekśpiertaŭ, z ulikam patrabavańniaŭ kredytoraŭ pavyšeńnie koštu płatnych pasłuh u Biełarusi ŭ 2016—2020 hadach vielmi vierahodnaje.
Pry hetym ekanamisty zaznačajuć, što ŭ krainie pakul nie stvorany adekvatnyja miechanizmy sacyjalnaj padtrymki ŭraźlivych słajoŭ nasielnictva.
«Razam z pavyšeńniem taryfaŭ dla nasielnictva pavinny być stvorany miechanizmy dla kampiensacyi finansavych strat, jakija paniasuć uraźlivyja słai nasielnictva. Plus da hetaha pavinny być maksimalna źnižanyja vydatki ŭ sistemie ŽKH, jakija pavyšajuć košt płatnych pasłuh. Reforma pavinna praduhledžvać kompleks mier, tady jana budzie nasić cełasny charaktar», — miarkuje dyrektar Daśledčaha centra IPM Alaksandr Čubryk.
Ekśpierty nazyvajuć niekalki sacyjalnych hrup, jakija ŭ najbolšaj stupieni mohuć paciarpieć ad pavyšeńnia taryfaŭ na žyllova-kamunalnyja pasłuhi. «Pastajanny rost taryfaŭ na takija pasłuhi moža stać najbolš adčuvalnym dla piensijanieraŭ, šmatdzietnych i niapoŭnych siemjaŭ. U takich siemjach kolkaść zaniatych členaŭ siamji adnosna nievialikaja, im ciažka atrymać efiekt ad maštabu i tamu dla ich pavyšeńnie taryfaŭ maje najbolšaje značeńnie», — zaznačaje ekanamist Hleb Šymanovič.
Nahadajem, zhodna ź dziejučym u Biełarusi zakanadaŭstvam, tempy rostu taryfaŭ na žyllova-kamunalnyja pasłuhi vyznačajucca dziaržavaj i rehłamientujucca rašeńniami prezidenta. Zhodna z ukazam № 550, pryniatym u kancy 2013 hoda, štohod z 1 studzienia taryfy na takija pasłuhi pavyšajucca ŭ pamiery, ekvivalentnym 5 dalaram ZŠA.
