Na sajcie Viarchoŭnaj Rady Ukrainy apublikavali zakonaprajekt, aŭtary jakoha prapanujuć zabaranić nazyvać Rasijskuju Fiederacyju Rasijaj.
Zakonaprajekt 3 lipienia ŭniesła deputat Aksana Karčynskaja z «Radykalnaj partyi» Aleha Laško, adnak padrabiaznaści stali viadomyja tolki ciapier.
U pryvatnaści, aŭtary zakonaprajekta prapanoŭvajuć zamiest słova «Rasija» vykarystoŭvać tolki poŭnaje najmieńnie «Rasijskaja Fiederacyja» albo słova «Maskovija». Za parušeńnie hetaha praviła prapanujecca ŭvieści kryminalnuju adkaznaść u vyhladzie pazbaŭleńnia voli terminam da 12 hadoŭ.
Na dumku aŭtaraŭ zakonaprajekta, Rasija pravodzić u dačynieńni da Ukrainy niesiabroŭskuju, impierskuju palityku. Pry hetym adno ź jaje aficyjnych najmieńniaŭ — «Rasija» — faktyčna źjaŭlajecca histaryčnaj nazvaj terytoryi, na jakoj raźmieščana sučasnaja Ukraina.
U suviazi z hetym aŭtary dakumienta ličać, što vykarystańnie słova «Rasija» ŭ jakaści aficyjnaha sinonima Rasijskaj Fiederacyi možna rascanić jak ahresiŭny napamin hramadzianam Ukrainy pra časovaść ich dziaržaŭnaści i jak zamach na dziaržaŭny suvierenitet Ukrainy.
Raniej ukrainski parłamient užo pryznaŭ Rasieju krainaj-ahresaram. Akramia taho, na fonie anieksii Kryma i zaciažnoha zbrojnaha kanfliktu na ŭschodzie krainy ŭ krainie byli zabaronienyja mnohija rasijskija filmy i sieryjały. Ukraina taksama zabaraniła ŭjezd niekatorym rasijskim palitykam i kulturnym dziejačam.
U adpaviednaści z rasijskaj kanstytucyjaj słova «Rasija» źjaŭlajecca aficyjnym najmieńniem krainy naroŭni z Rasijskaj Fiederacyjaj. Asnoŭny zakon krainy vyznačaje hetyja dva najmieńni jak poŭnyja sinonimy.
