Rada Adzinaj Lihi VTB siońnia na pasiadžeńni ŭ Maskvie zaćvierdziła farmat i skład udzielnikaŭ čempijanatu-2015/16. U novym siezonie baskietbolnaj Adzinaj Lihi VTB, jak i ŭ papiarednim, prymuć udzieł 16 kłubaŭ, u tym liku minskija «Cmoki».
Taksama siarod udzielnikaŭ — pačatkoviec Lihi, hruzinski kłub «Vita» z Tbilisi. Rašeńnie ab uklučeńni «Vity» ŭ skład udzielnikaŭ čempijanatu było adnahałosna zaćvierdžana na Radzie Lihi. Hruzinskaja kamanda zamienić rasijskija «Čyrvonyja Kryły», jakija nie zhulajuć u Adzinaj Lizie VTB u novym siezonie.
Farmat spabornictvy nie źviedaŭ źmien. Rehularny siezon Adzinaj Lihi VTB startuje ŭ kastryčniku 2015 hoda i zavieršycca ŭ krasaviku 2016 hoda. Kožnaja kamanda praviadzie 30 hulniaŭ: adnu doma, adnu ŭ haściach.
Vosiem najlepšych kamand pa vynikach «rehularki» prymuć udzieł u płej-of, jaki projdzie ŭ mai — červieni 2016 hoda.
U minułym hodzie «Cmoki» finišavali na 15-m miescy z 7 pieramohami i 23 parazami, apiaredziŭšy «Čyrvonyja Kryły» tolki za košt lepšaj roźnicy ačkoŭ.
