Zasnavalnik sacyjalnaj sietki Facebook Mark Cukierbierh i jaho žonka Pryscyła Čan čakajuć dzicia, napisaŭ Cukierbierh na svajoj staroncy ŭ sacsietcy.
Para ŭžo viedaje poł dziciaci: jany stanuć baćkami dački. Pry hetym Cukierbierh pryznaŭsia, što jany sprabujuć zavieści dzicia ŭžo «paru hadoŭ», i trojčy ciažarnaść skančałasia vykidyšam.
«Vy poŭnyja nadziei, kali daviedajeciesia, što ŭ vas budzie dzicia. Vy pačynajecie pradstaŭlać, kim jon stanie i maryć ab jaho budučyni. Vy budujecie płany, i ŭ adzin momant usie skančajecca. Hety vopyt źviazany z adzinotaj. Bolšaść ludziej nie abmiarkoŭvajuć vykidyšy: vy turbujeciesia, što vašyja prablemy pryviaduć da adčužeńnia ci jašče niejak paŭpłyvajuć — byccam z vami niešta nie tak ci vy spravakavali heta svaimi dziejańniami. Vy pieražyvajecie heta sami pa sabie», — piša jon.
Ale kali jany vyrašyli raspavieści ab svaich ciažkaściach siabram, vyśvietliłasia, što mnohija z hetym sutykalisia i amal va ŭsich u vyniku naradžalisia zdarovyja dzieci. Ciapier para spadziajecca, što ich vopyt dapamoža nabyć nadzieju tym, chto akazaŭsia ŭ takoj ža situacyi, i dapamoža im nie pieražyvać heta ŭ adzinocie.
«Dobraja navina — što naša ciažarnaść ŭžo na dosyć poźnim terminie, i ryzyka straty dziciaci vielmi maleńkaja, my poŭnyja nadziei», - napisaŭ C.
