Paśla ciažkoj chvaroby ŭ Miensku pajšoŭ z žyćcia biełaruski mastak Hieorhi Skrypničenka, jaki ŭvachodziŭ u tvorčuju supołku «Pahonia» pry Sajuzie mastakoŭ.
Pra heta paviedamiŭ staršynia Sajuzu mastakoŭ Biełarusi Ryhor Sitnica.
Ryhor Sitnica zaznačyŭ, što adychod znanaha mastaka-siurrealista z vyraznaj nacyjanalnaj pazycyjaj — vializnaja strata dla biełaruskaha mastactva:
«Śmierć Hieorhija Skrypničenki — najvialikšaja strata našaha vyjaŭlenčaha mastactva. Hieorhi Siarhiejevič byŭ nadziva admietnaj asobaju ŭ asiarodździ biełaruskich mastakoŭ, čałaviek ź vielmi vyraznym nacyjanalnym śvietapohladam, čałaviek z abvostranym pačućciom nacyjanalnaj i hramadzianskaj hodnaści, čałaviek, jaki prytrymlivaŭsia nacyjanalnych kaštoŭnaściaŭ i ŭsialak ich umacoŭvaŭ i adstojvaŭ, choć i pracavaŭ u, zdavałasia b, davoli niazvykłym žanry siurrealizmu. Jon i źniešnie byŭ trochi padobny da Salvadora Dali. Vielmi vykštałcony majstar, jakich u nas mała.
Jon byŭ vielmi dobrym čałaviekam, ščyrym siabram, dobrazyčlivy da ŭsich kalehaŭ. Ja navat ujavić nia moh, što ŭ jaho mahli być niejkija niadobrazyčliŭcy. Z usimi byŭ vielmi karektny, žartaŭlivy. Vielmi niečakany adychod, ale nichto i nie pavieryć, što jamu było amal 75 hod, — nastolki šlachietna i impazantna jon zaŭsiody vyhladaŭ. Hetkim jon nam i zapomnicca. Jaho nichto nie zapomnić starym, tamu što jon nie paśpieŭ pastareć», — skazaŭ Ryhor Sitnica.
Hieorhi Skrypničenka naradziŭsia ŭ 1940 hodzie va ŭkrainskim horadzie Mikałajevie. Skončyŭ Mienskuju mastackuju vučelniu, pracavaŭ va Ŭsiesajuznym NDI techničnaj estetyki.
Samyja viadomyja pracy: seryja «Vydatnyja dziejačy biełaruskaj kultury», seryja «Mastaki Ajčynie», karciny «Mirnaja ziamla», «Vobrazy miłyja rodnaha kraju», «Adčuvańnie Radzimy», «Žakiej», «Alehoryja śvietu», «Pryśviačeńnie M. Sielaščuku», «Ekalahičnaja raŭnavaha», «Skaryna na Radzimie», «Jak spravy ŭ Čarnobyli?», «Stračanyja mary», «Smutak», «Apošnija hulni», «Pamiarkoŭny», «Čas majho žyćcia», «Zabrudžanaja ziamla», «Da 200-hodździa A. Mickieviča», «Suisnavańnie», «Łancuh žorstkaści», «Halšany».
Tvory Siarhieja Skrypničenki z sajtaŭ Nacyjanalnaha Połackaha historyka-kulturnaha muzeju-zapaviednika i Muzeju sučasnaha vyjaŭlenčaha mastactva:
