Pravaabaroncy miarkujuć, što biełaruskija ŭłady mohuć uzmacnić kantrol nad byłym palitźniavolenym, eks-kandydatam na prezidenckuju pasadu Mikałajem Statkievičam, kali na toje buduć palityčnyja pryčyny.
Jak paviedamlałasia raniej, 24 žniŭnia ŭ RUUS Leninskaha rajona Minska było pryniataje rašeńnie ŭstanavić nad Statkievičam prafiłaktyčnaje nazirańnie na vosiem hadoŭ.
U kamientary BiełaPAN juryst Pavieł Sapiełka zaznačyŭ, što prafiłaktyčnaje nazirańnie — «nie taki surjozny varyjant nahladu, jak previentyŭny nahlad, tut bolš łajalnyja abmiežavańni». Padobnaja miera, pavodle jaho słoŭ, ustanaŭlivajecca na termin pahašeńnia sudzimaści, a ŭ vypadku Statkieviča heta termin za asabliva ciažkija złačynstvy. Kantrolnaja miera nakładaje na palityka abaviazak «papiarednie paviedamlać orhanu ŭnutranych spraŭ ab źmianieńni miesca žycharstva, vyjeździe ŭ inšuju miascovaść na termin da adnaho miesiaca, abaviazak źjaŭlacca pa vykliku ŭ orhan unutranych spraŭ i davać tłumačeńni nakont svajho ładu žyćcia».
Tym nie mienš, padkreśliŭ juryst, u vypadku ŭčynieńnia troch pravaparušeńniaŭ, nie važna jakich, na praciahu adnaho hoda sud moža ŭstanavić nad Statkievičam previentyŭny nahlad — bolš žorstkuju mieru z bolšymi abmiežavańniami. Takim čynam, kali palityka abvinavaciać u troch navat samych niaznačnych administracyjnych pravaparušeńniach, to «ŭ suda tady budzie farmalnaja padstava dla pryznačeńnia previentyŭnaha nahladu». «Biezumoŭna, heta moža być nie pravavym rašeńniem, ale z punktu hledžańnia litary i duchu ajčynnaha zakona, heta budzie dapuščalnaje rašeńnie», — skazaŭ Sapiełka.
Namieśnik kiraŭnika likvidavanaha ŭładami pravaabarončaha centra «Viasna» Valancin Stefanovič u svaju čarhu adznačyŭ: «Havaryć, što vyzvalenyja palitźniavolenyja ŭ poŭnaj miery svabodnyja, nie davodzicca».
«Treba patrabavać adnaŭleńnia ich u hramadska-palityčnych pravach. Bo sudzimaść nie dazvalaje, naprykład, udzielničać u vybarach u jakaści kandydata ŭ deputaty miascovych savietaŭ, parłamienta, prezidenty. Na praciahu vaśmi hadoŭ Statkievič budzie ciarpieć paražeńnie ŭ palityčnych pravach», — skazaŭ pravaabaronca.
Prafiłaktyčnaje nazirańnie toić u sabie niebiaśpieku pieraraści ŭ previentyŭny nahlad, bo «ŭ vypadku «nieabchodnaści» zaŭsiody možna vyłajacca matam, heta ŭ Biełarusi prosta robicca». Ujaŭnaje parušeńnie nahladu potym moža stać pryčynaj «viartańnia za kraty, jak heta adbyłosia z aktyvistam Vasilom Parfiankovym». Usie hetyja miery, pavodle słoŭ Stefanoviča, «robiać byłych palitźniavolenych nieabaronienymi, dazvalaje ŭładam maksimalna ich kantralavać».
Takim čynam, nahladnyja miery źjaŭlajucca «surjoznym instrumientam uździejańnia». «U vypadku sa Statkievičam, kali na toje budzie palityčnaja pryčyna i žadańnie ŭładaŭ, hety instrumient budzie vykarystany», — padsumavaŭ pravaabaronca.
