U Drui adnoŭlenaja ikona Maci Božaj Spahadlivaj, los aryhinała jakoj nieviadomy.
Cudadziejnaja ikona Maci Božaj Spahadlivaj z Drui viadomaja ŭ miastečku ažno z XVIII stahodździa. Uzhadvajecca jana ŭ śpisie 1911 hoda carkvy Dabravieščańnia. Źjaŭlajecca śpisam ź ikony «Baharodzicy» Jeleŭsa Spahadlivaja (Kikskaja), jakaja z CHII stahodździa zachoŭvajecca na Kipry, u zasnavanym dziela jaje impierataram Alaksiejem Komnenam (hrec. Ἀλέξιος Κομνηνός, 1082−1118) manastyry na hary Kikas. Ikona ličycca adnoj z troch, što napisaŭ jevanhielist Łuka. Kopii hetaj ikony viadomyja i pašyranyja na Afonie, ale na ŭschodnich ziemlach dastatkova redkija. Viadomaja kopija hetaj ikony na Fłaryščanskaj pustyni, taksama ikona Simana Ušakova (ciapier u Traciakoŭskaj halirei). Tym bolšuju kaštoŭnaść ujaŭlaje Drujskaja ikona.
Maci Božaja pradstaŭlena sa schilenaj hałavoj da Dziciaci, jakoha padtrymlivaje levaj rukoju. U pravaj ruce Baharodzica trymaje ruku Dziciaci z razhornutaj skrutkam. Dziciatka paviernuty naprava ad hledača, hałava jaho pachilena naleva, u pravaj ruce skrutak, levaja lažyć na hrudziach Božaj Maci, nožki aholenyja.
Na poli ikony Maci Božaj Spahadlivaj z Drui vialikimi litarami pieradajecca hrecki nadpis ΜΗΡ ΘΟΥ (hrec. Μητερ Θεου− Maci Boha) i Η ΕΛΕΟΥΣΑ Η ΚΥΚΚΟΥΤι ΣΣΑ (hrec. ή Ελεούσα ή Κυκκώτισσα − Spahadlivaja Kikijanka). Maforyj i jaho padkład drujskaj Baharodzicy niezvyčajna dla kanonaŭ ikanapisu raśpisany raznastajnymi kvietkami i arnamientnymi elemientami. Pradstaŭlenyja try trochkutniki ŭ jaho składkach taksama možna zaŭvažyć u drapiroŭcy chitona Chrysta. Płyŭnymi paŭtaralnymi paŭkruhłymi składkami spadajuć chiton Dziciaci i maforyj Božaj Maci. Chrystos apiarazany pasam, skryžavanym u vuźle. Bieły razvarot skrutka, sensavaha centra ikony z nadpisam na carkoŭnasłavianskaj movy z knihi praroka Isai (62,1-2) «Duch Hospodień na Mnie, Jeho žie radi pomaza Mia» − uraŭnavažvajecca i razam z tym akcentujecca biełymi rukavami kašuli Dziciaci, upryhožanymi taksama arnamientami. Bieły koler u kampazicyi kładziecca jak by viejeram.
Na ikonie Maci Božaj Spahadlivaj Jeleŭsy pamiž Maryjaj (simvałam i ideałam rodu čałaviečaha) i Boham−Synam niama adlehłaści, što śviedčyć ab biaźmiežnaści ich lubovi, lubovi Boha da stvoranaha śvietu, Chrysta i Carkvy. Abraz źjaŭlajecca pravobrazam kryžovaj achviary Zbaviciela jak vyšejšaha vyrazu lubovi Boha da ludziej.
U siaredzinie XVII stahodździa na našych ziemlach ŭzmacniajecca cikavaść da staražytnych vizantyjskich śviatyniaŭ i, pierš za ŭsio, da cudadziejnych Baharodzičnych abrazoŭ. «Maci Božaja Jeleŭsa Kikskaja» moža być razhledžana jak śviedčańnie padobnaj cikavaści da staražytnych śviatyniaŭ vizantyjskaha śvietu, adnoj z hałoŭnych pryčynaŭ čaho było imknieńnie adnavić u pieršapačatkovaj čyścini staražytnyja ikanapisnyja tradycyi našymi prodkami.
Chočacca spadziavacca, što viartańnie ikony Maci Božaj Spahadlivaj u Druju, praź jaje adnaŭleńnie pa eskizie sa śpisaŭ carkvy Dabravieščańnia, źmieščanym u albomie malunkaŭ Dz. Strukava, paspryjaje jadnańniu chryścijanaŭ i pašyreńniu kulta Baharodzicy. Inicyjatyva adradžeńnia ikony pachodzić ad ajca Siarhieja Stasieviča z Łondana, adnaviŭ ikonu Michaś Kuskoŭ, ikanapisiec ź Viciebska. Aśviačeńnie ikony płanujecca vosieńniu hetaha hoda ŭ kaściole Najśviaciejšaj Trojcy ŭ Drui.
