Trahiedyja adbyłasia 5 žniŭnia, ale tolki ciapier źjavilisia dokazy. Vydańnie turkmienskaj pravaabarončaj arhanizacyi «Chronika Turkmienistana» paviedamlaje, što na adkryćcio stadyjona «Kapietdah» u Ašchabadzie narod zahnali na stadyjon a 5-j ranicy dla masoŭki.
Uračystaje adkryćcio pavinna było adbycca a 7-j ranicy. Adnak prezident Turkmienistana Hurbanhuły Bierdymuchamiedaŭ źjaviŭsia na «Kapietdahu» ažno ŭ 11:45. Amal siem hadzin ludzi va ŭzroście ad čatyroch da 70 hadoŭ stajali pad piakučym soncam u ačapleńni. Za hadziny čakańnia prytomnaść stracili kala 50 čałaviek, 14 byli špitalizavanyja jašče da pačatku mierapryjemstva, troje ź ich pamierli ŭ toj ža dzień, śćviardžaje ananimnaja krynica. Siarod zahinułych — adno dzicia.
Čamu prezident Turkmienistana spaźniŭsia? Jamu prosta zachaciełasia da adkryćcia stadyjona ahledzieć inšyja abjekty.
Mała taho, da hadziny dnia ŭsie vulicy ŭ radyusie čatyroch kiłamietraŭ byli pierakrytyja, u tym liku i da centraŭ nieadkładnaj dapamohi. Da źniaćcia ačapleńnia ni ludzi, ni miedpiersanał nie mahli patrapić u balnicy.
Heta nie redkaść u Turkmienistanie. «Letaś prezident pryjazdžaŭ u horad Mary ź vizitam. Dziaciej pašychtavali ŭzdoŭž darohi, a ŭ ich urezaŭsia aŭtamabil prezidenckaj achovy. U vyniku zahinuli dzieci. My pra heta kazali navat na adnym sa schodaŭ u AAN pa pravach čałavieka, i turkmienskija ŭłady heta pryznali. Skazali navat, što rasśledavańnie zaviaduć», — raspavioŭ vydańniu «Nastojaŝieje Vriemia» redaktar sajta turkmienskaj pravaabarončaj arhanizacyi Faryd Tuchbatulin.
