Ministr finansaŭ Rasii Anton Siłuanaŭ zajaviŭ, što Maskva nie maje namieru śpisvać doŭh Ukrainie i budzie patrabavać viarnuć srodki ŭ poŭnym abjomie.
«Rasijski doŭh źjaŭlajecca suvierennym. U dačynieńni da suvierennych daŭhoŭ isnuje admysłovaja pracedura ŭrehulavańnia ŭ takich vypadkach. My nie budziem ustupać u pieramovy z ukrainskim uradam u hetaj častcy», — skazaŭ Siłuanaŭ.
Raniej prezident Ukrainy Piatro Parašenka zajaviŭ, što Rasija pavinna da kanca hoda vyznačycca, ci budzie jana ŭdzielničać u restrukturyzacyi častki ŭkrainskaha dziarždoŭhu.
Kredyt u 3 młrd dalaraŭ Rasija prapanavała Ukrainie jašče ŭ 2013 hodzie, kali prezidentam Ukrainy byŭ Viktar Janukovič. Ciapierašni prezident Ukrainy Piatro Parašenka letam 2015 nazvaŭ rasijski kredyt «chabaram», jaki eks-prezident Viktar Janukovič atrymaŭ za admovu padpisvać Pahadnieńnie ab asacyjacyi ź Jeŭrasajuzam u listapadzie 2013 hoda.
U lipieni Mižnarodny valutny fond uchvaliŭ vydzialeńnie Ukrainie tranšu ŭ pamiery 1,7 młrd dalaraŭ. Prahrama kredytavańnia Ukrainy raźličana na čatyry hady: za hety čas, jak miarkujecca, Kijeŭ pavinien atrymać ahułam 17,5 młrd dalaraŭ.
