U Biełarusi moža pačacca zborka kamiercyjnych aŭtamabilaŭ Iveko i lehkavych — Fiat. Pra heta išła razmova 10 vieraśnia padčas naviedvańnia premjer-ministram Biełarusi Andrejem Kabiakovym kancerna Fiat Chrysler Automobiles u italjanskim Turynie. Kiraŭnik biełaruskaha ŭrada pravioŭ pieramovy z kiraŭnictvam kancerna i paznajomiŭsia z vytvorčaściu.
Jak paviedamlaje pres-słužba ŭrada, premjer-ministr, razmaŭlajučy z kiraŭnictvam kancerna, zaznačyŭ, što Biełaruś hatovaja arhanizavać vizit delehacyi pradpryjemstva ŭ Minsk dla dalejšaha raźvićcia supracoŭnictva.
«Baki papiarednie damovilisia ab realizacyi dvuch prajektaŭ pa zborcy lehkavych i kamiercyjnych aŭtamabilaŭ. Razmova išła pra kamiercyjnyja aŭtamabili Iveko, Fiat, lehkavyja aŭtamabili. Pieršy krok — stvareńnie bujnavuzłavoj zborki ŭ 2016 hodzie, u 2017—2018 hadach miarkujecca dasiahnuć peŭnaj łakalizacyi — 30-50%», — havorycca ŭ paviedamleńni.
U prajektach z Fiat Chrysler Automobiles praduhledžvałasia zadziejničać placoŭki SP ZAT «Junison» (płanujecca vyrablać 20 tys. aŭtamabilaŭ u hod) i «BiełaŭtaMAZa». Suma inviestycyj pakul nie nazyvajecca, abmiarkoŭvalisia madeli i techničnaja padtrymka.
Na sustrečy z kiraŭnictvam kancerna taksama išła razmova ab stvareńni rabočaj hrupy pa raspracoŭcy miemaranduma ab supracoŭnictvie Biełarusi i Fiat Chrysler Automobiles.
Fiat Chrysler Automobiles — najbujniejšaja aŭtamabilebudaŭničaja kampanija, zasnavanaja paśla źlićcia kancerna FIAT z amierykanskim Chrysler. Kampanija źjaŭlajecca siomym pa vieličyni ŭ śviecie aŭtavytvorcam. Štab-kvatera znachodzicca ŭ Niderłandach, finansavy centr — u Vialikabrytanii.
