Zachavańnie samabytnaści i tradycyj biełaruskaha naroda, raŭnapraŭnaje i ŭzajemavyhadnaje supracoŭnictva Biełarusi z zamiežnymi partniorami, umacavańnie i raźvićcio supracoŭnictva ŭ miežach SND, Jeŭrazijskaha ekanamičnaha sajuza, pahłybleńnie i raźvićcio ŭzajemavyhadnych i raŭnapraŭnych sajuźnickich adnosin z Rasijaj prapanuje ŭ svajoj pieradvybarnaj prahramie kandydat u prezidenty Mikałaj Ułachovič — staršynia Biełaruskaj patryjatyčnaj partyi, viarchoŭny ataman RHA «Biełaruskaje kazactva».
U raździele prahramy pra duchoŭna-patryjatyčnaje vychavańnie jon vystupaje za raźvićcio «nacyjanalnaj identyčnaści biełaruskaj nacyi na asnovie šmatviakovaj histaryčnaj spadčyny, tradycyj i kultury, praz adradžeńnie rodnaj movy». Asnoŭnaj metaj takoha vychavańnia Ułachovič nazyvaje «ŭsiebakovaje raźvićcio asoby, pryvićcio takich jakaściaŭ, jak patryjatyzm, talerantnaść i nieciarpimaść da prajavy nasilla ŭ luboj formie».
Uzajemarazumieńnie, havorycca ŭ prahramie, pavinna stać «asnovaj dla pastajannaha dyjałohu pamiž roznymi hramadska-palityčnymi siłami hramadstva, što nie dapuścić siłavoha supraćstajańnia». Ułachovič taksama vystupaje za «procidziejańnie sprobam pierapisać historyju», zaklikaje zachavać «histaryčnuju praŭdu pra vialikuju pieramohu nad fašyzmam».
U raździele, jaki datyčycca ŭmacavańnia dziaržaŭnaści, Ułachovič adznačaje, što «mudraść i vopyt biełaruskaha naroda dazvalajuć paźbiehnuć ślapoha paŭtoru pryncypaŭ iluzornaj zamiežnaj demakratyi biez admaŭleńnia pieradavych ahulnačałaviečych kaštoŭnaściaŭ i značnaści najbolej pieradavych form uzajemadziejańnia hramadzianskaj supolnaści i ŭłady». «Tvorčaść, prafiesijanalizm, sumlennaść i prystojnaść — voś tyja jakaści, bieź jakich nichto nie moža być dapuščany da dziaržaŭnaj słužby», — havorycca ŭ prahramie.
Ułachovič vystupaje za: harantyju biaśpieki asoby i hramadstva; dalejšuju kansalidacyju biełaruskaha hramadstva praz pašyreńnie ŭdziełu pradstaŭnikoŭ hramadzianskaj supolnaści ŭ kiravańni dziaržavaj; udaskanaleńnie vybarčaha zakanadaŭstva šlacham pierachodu na źmiašanuju sistemu vybaraŭ; udaskanaleńnie sistemy dziaržaŭnaha kiravańnia praz uchileńnie praźmiernaj centralizacyi i davańnie bolšaj samastojnaści subjektam haspadarčaj dziejnaści; baraćbu z karupcyjaj i dalejšaje ŭdaskanaleńnie miechanizmaŭ udziełu instytutaŭ hramadzianskaj supolnaści ŭ antykarupcyjnaj dziejnaści.
U prahramie adznačajecca nieabchodnaść bieražlivaha staŭleńnia da pryrody, adnaŭleńnia pryrodnych resursaŭ praz ukaranieńnie prahresiŭnych mietadaŭ haspadarańnia na ziamli i «zialonych» technałohij.
Ułachovič zajaŭlaje pra važnaść raźvićcia i ŭmacavańnia «tradycyjnych dla Biełarusi halin ekanomiki, admovu ad vytvorčaści «ŭsiaho ŭ siabie» i zabieśpiačeńnie patrebnaściaŭ dziaržavy praz pašyreńnie miždziaržaŭnaj ekanamičnaj intehracyi».
Kandydat vystupaje za «pavyšeńnie kankurentazdolnaści vypuščanaj pradukcyi, stvareńnie ŭmoŭ, jakija sapraŭdy zabiaśpiečvajuć prytok inviestycyj i pieradavych technałohij». Ułachovič abiacaje paetapna skaracić źniešni doŭh, pravieści padatkovuju reformu, a taksama ŭsiebakova padtrymlivać i raźvivać pryvatnyja inicyjatyvy i pradprymalnictva.
Ułachovič harantuje «poŭnuju pracoŭnuju zaniataść dla pracazdolnaha nasielnictva», vykarystańnie «vysokaj prafiesijnaj padrychtoŭki i šmathadovaha vopytu pracujučych piensijanieraŭ», zachavańnie «pierajemnaści pracoŭnych dynastyj». «Kryteryjem dla zvalnieńnia rabotnika pavinien być nie ŭzrost, a jakaść vykananaj pracy», — havorycca ŭ prahramie.
Kandydat u prezidenty zajaŭlaje pra namier ukaraniać pieradavyja suśvietnyja biezadchodnyja i małaadchodnyja technałohii ŭ vytvorčaść, sielskuju haspadarku, budaŭnictva, žyllova-kamunalnaje budaŭnictva i inšyja haliny. Pry hetym jon vystupaje za praciah subsidavańnia dziaržavaj pasłuh ŽKH.
U sacyjalnaj śfiery Ułachovič abiacaje zabiaśpiečyć hodnuju zarpłatu ŭračam, miedpiersanału, nastaŭnikam, supracoŭnikam daškolnych ustanoŭ, rabotnikam kultury, a taksama zachavać dziaržpadtrymku dla najmienš zabiaśpiečanych słajoŭ nasielnictva.
Akramia hetaha, kandydat abiacaje pavialičyć dziaržaŭnyja ŭkładańni ŭ raźvićcio achovy zdaroŭja, adukacyi, kultury i navuki, zabiaśpiečyć roŭnuju dastupnaść nasielnictva da vysokatechnałahičnaj miedycyny i adukacyi.
Ułachovič vystupaje za pryniaćcie dziejnych mier pa farmiravańni dastupnaha asiarodździa dla ludziej z abmiežavanymi mahčymaściami i asablivaściami ŭ raźvićci, umacavańnie suviazi navuki z vytvorčaściu, usialakaje spryjańnie raźvićciu ŭ hramadstvie zdarovaha ładu žyćcia. «Patryjatyzm, luboŭ da Radzimy, pavaha da historyi, zachavańnie i pamnažeńnie tradycyj, siamiejnych kaštoŭnaściaŭ i hatoŭnaść abaraniać ich zabiaśpiečać mir, spakoj i paradak u Respublicy Biełaruś», — padkreślivajecca ŭ prahramie.
Raniej svaje pieradvybarnyja prahramy apublikavali jašče dva kandydaty ŭ prezidenty — staršynia Libieralna-demakratyčnaj partyi Siarhiej Hajdukievič i aktyvistka kampanii «Havary praŭdu» Taćciana Karatkievič. Tezisy prahramy jašče adnaho kandydata — Alaksandra Łukašenki — pakul nieviadomyja.
Ciapier čytajuć
Jak žyvie Aleś Muchin, viadomy znaŭca «Što? Dzie? Kali?»15
Kamientary