Charvatyja nie stanie «centram pa pryjomie biežancaŭ» i budzie pierapraŭlać dalej mihrantaŭ, jakija prybyvajuć u krainu, zajaviŭ premjer-ministr Zoran Miłanavič.
Charvacki premjer adznačyŭ, što kraina ŭžo dasiahnuła miažy mahčymaściaŭ pa pryjomie mihrantaŭ. Za apošnija dni na terytoryju krainy prybyli bolš za 14 tysiač čałaviek.
Na 23 vieraśnia namiečany ekstranny samit Jeŭrapiejskaha sajuza, hałoŭnaj temaj jakoha stanie situacyja z napłyvam mihrantaŭ.
Z-za bieśpierapynnaha patoku mihrantaŭ charvackaja palicyja pierakryła siem z vaśmi pamiežnych pierachodaŭ ź Sierbijaj. Sierbija abiacaje padać na Charvatyju ŭ mižnarodny sud, kali pierachody zastanucca zakrytymi.
Białhrad aścierahajecca, što dziasiatki tysiač mihrantaŭ mohuć apynucca faktyčna začynienymi na sierbskaj terytoryi. Raniej Vienhryja zaviaršyła budaŭnictva zaharod na miažy ź Sierbijaj; vienhierskaja palicyja sprabuje spynić bieskantrolny pierachod ludziej.
«My nie źbirajemsia płacić za čyjuści niehatoŭnaść. Mnie vielmi škada, što humannaść i haścinnaść Charvatyi praciahnulisia ŭsiaho dva dni», — zajaviŭ ministr pa sacyjalnych pytańniach Sierbii Alaksandr Vulin.
Charvackija ŭłady nastojvajuć, što kraina dasiahnuła miažy svaich mahčymaściaŭ.
«My zaklikajem ES ŭśviadomić, što Charvatyja nie moža stać centram pa pryjomie biežancaŭ. U nas jość serca, ale ŭ nas jość i mozh», — emacyjna prakamientavaŭ situacyju charvacki premjer Miłanavič.
