Biełaruskaja čyhunka pačała pracy pa elektryfikacyi ŭčastka Maładziečna — Hudahaj — dziaržaŭnaja miaža ź Litvoj. Kali tut možna budzie puścić elektryčku, čas u šlachu pamiž Minskam i Vilniaj skarocicca da dźviuch hadzin, abiacajuć čyhunačniki.
«Paśla zaviaršeńnia elektryfikacyi stanuć jašče bližej adno da adnaho žychary dźviuch jeŭrapiejskich stalic — Minska i Vilni, a čas u šlachu pamiž imi skarocicca da dźviuch hadzin», — zajaviŭ načalnik BČ Uładzimir Marozaŭ, paviedamlaje pres-słužba BČ.
Praciahłaść učastka ad Maładziečna da miažy ź Litvoj — 84 kiłamietry. Całkam elektryfikavać jaho płanujuć da kanca 2016 hoda.
Litoŭskija čyhunki ciapier ažyćciaŭlajuć padobny prajekt sa svajho boku: viaduć elektryfikacyju ŭčastka ŭ 30 kiłamietraŭ ad stancyi Novaja Vilnia da miažy ź Biełaruśsiu.
Čyhunačniki adznačajuć, što novaŭviadzieńni pryniasuć karyść nie tolki pasažyram, jakija zmohuć chutčej dabiracca ŭ Vilniu. Elektryfikacyja ŭčastka dazvolić stvaryć «mahutny i technałahičny transpartna-łahistyčny kompleks dla tranzitu hruzapatokaŭ z Poŭnačy na Poŭdzień, Uschodu na Zachad. U pierśpiektyvie jon stanie važnym składnikam stvaranaha Ekanamičnaha pojasa Šaŭkovaha šlachu, pavysić tranzitnuju pryvabnaść mižnarodnych transpartnych kalidoraŭ, jakija prachodziać praz terytoryju našaj krainy».
U apošnija piać hadoŭ BČ elektryfikavała ŭčastak Žłobin — Asipovičy (107,2 km), nabližajecca da zaviaršeńnia elektryfikacyja ŭčastka Homiel — Žłobin (86 km).
