Deeskałacyja situacyi na Danbasie pazbaŭlaje Ukrainu mahčymaści tłumačyć vajnoj pavolnaje refarmavańnie, a Rasii daje šaniec na pazbaŭleńnie ad sankcyj Jeŭrasajuza.
Pra heta piša ŭ polskim vydańni «Gazeta Wyborcza» ahladalnik Tomaš Bialecki.
Prahnazavać, što budzie na Danbasie praź niekalki miesiacaŭ, ryzykoŭna, ale ciapier tam prachodzić najbujniejšaja deeskałacyja za ŭvieś čas z pačatku vajny. Tamu ZŠA i ES pačali bolš uvažliva pryhladacca da «druhoha frontu» Ukrainy, adznačaje aŭtar artykuła.
A ŭkrainskija źmieny prasoŭvajucca značna pavolniej, čym chacieli b na Zachadzie, adznačaje Bialecki.
Na minułym tydni ekśpiert Centra Karnehi Bałaš Jarabik padčas prezientacyi novaha dakładu ab ukrainskich reformach u Brusieli adznačyŭ, što reformy nadzvyčaj słabyja ŭ dvuch klučavych śfierach: baraćbie z karupcyjaj i źmienie pravaachoŭnaj sistemy.
Pry hetym «zamarožany» kanflikt na Danbasie stanovicca ŭsio mieniej pierakanaŭčym arhumientam ukrainskaj ŭłady ŭ apraŭdańnie pramarudžańnia z reformami, piša Bialecki.
Hetyja apraŭdańni ŭsio mienš dziejničajuć na prostych ukraincaŭ, jakija «va ŭsich apytańniach» nazyvajuć siarod hałoŭnych pryčyn paharšeńnia ekanamičnaha stanu karupcyju, aliharchaŭ, niekampietentny ŭrad i tolki zatym vajnu na Danbasie, havorycca ŭ artykule.
Miž tym, zajava prarasiejskich bajevikoŭ ab «pieranosie» tak zvanych «miascovych vybaraŭ» na padkantrolnaj im častcy Danbasa ŭskładniaje sprečku ŭ ES ab metazhodnaści praciahu sankcyj suprać Rasii.
Bialecki adznačaje, što ŭ adpaviednaści z umovami Minskich pahadnieńniaŭ spačatku pavinny adbycca hałasavańni ŭ Daniecku i Łuhansku, a ŭžo potym Ukraina atrymaje kantrol nad stračanym učastkam miažy, praź jaki Rasija pierakidaje vojski i zbroju. Pry hetym u Maskvie nastojvajuć na asablivym statusie akupavanych terytoryj Danbasa.
«Usio heta pavodle Minskich pahadnieńniaŭ pavinna było adbycca da śniežnia, paśla hetaha ŭ studzieni ES pavinien byŭ pierahledzieć pytańnie ab praciahu abo admienie sankcyj suprać Rasii. Adnak ciapier hety płan złamaŭsia, pakolki vybary na zachoplenych terytoryjach pieraniesienyja na nastupny hod», — havorycca ŭ artykule,
«A značyć, Rasija moža i kantrol nad miažoj Ukrainie nie viartać, i pry hetym pazbavicca ad sankcyj ES, pakolki ŭ Jeŭropie ŭžo hučać hałasy ab tym, što Maskva pačała supracoŭničać pa ŭrehulavańni kanfliktu na Danbasie i sankcyi nie patrebnyja», — ličyć aŭtar «Gazeta Wyborcza».
