Prezidenckija vybary 11 kastryčnika znoŭ pakazali, što Biełarusi jašče treba doŭha iści pa šlachu da vykanańnia abaviazacielstvaŭ ABSIE pa demakratyčnych vybarach.
fota Siarhieja Bałaja, Tut.by
Pra heta havorycca ŭ spravazdačy naziralnaj misii Biuro pa demakratyčnych instytutach i pravach čałavieka (BDIPČ) ABSIE, pradstaŭlenaj siońnia na pres-kanfierencyi ŭ Minsku.
«Heta padkreślivaje nieabchodnaść palityčnaj voli dla praviadzieńnia ŭsioabdymnaha pracesu reform», — padkreślivajecca ŭ dakładzie.
Naziralniki BDIPČ ABSIE pakazali na niekatoryja palapšeńni i «vietlivaje staŭleńnie» da misii. Ale «značnyja prablemy, asabliva padčas padliku i źviadzieńnia vynikaŭ hałasavańnia, padarvali sumlennaść vybaraŭ», adznačajecca ŭ dakładzie.
Pry hetym padkreślivajecca, što vybarčaja kampanija i dzień vybaraŭ prachodzili mirna.
«Heta vidavočna, što pierad Biełaruśsiu doŭhi šlach, kab vykanać usie demakratyčnyja abaviazacielstvy, — skazaŭ śpiecyjalny kaardynatar misii karotkaterminovych naziralnikaŭ Parłamienckaj asamblei ABSIE na prezidenckich vybarach u Biełarusi, namieśnik staršyni PA ABSIE Kient Charsted. — Vyzvaleńnie palitviaźniaŭ i sardečny padychod da naziralnikaŭ źjaŭlajucca pazityŭnymi momantami. Adnak taja nadzieja, jakuju nam heta dało, nie spraŭdziłasia. Uličvajučy papiarednija abiacańni, ja asabliva rasčaravany niedachopami padčas padliku i sumavańnia hałasoŭ. My spadziajomsia, što biełaruski ŭrad prajavić palityčnuju volu dla paŭnavartasnaha pracesu reform, u čym my hatovyja akazać padtrymku».
U spravazdačy adznačajecca, što ŭsie kandydaty zmahli pravieści ahitacyjnyja kampanii pa ŭsioj krainie i danieści svaje pasłańni bieź pieraškod. Vybarčaja kampanija «była ścipłaj, ale stała bolš aktyŭnaj u apošnija dva tydni».
U toj ža čas adznačajecca, što tolki adzin kandydat, čyja pieradvybarnaja płatforma była skancentravana na sacyjalna-ekanamičnych pytańniach, byŭ «adkryta krytyčna nastrojeny ŭ dačynieńni da dziejnaha prezidenta». Heta abmiažoŭvała vybar vybarščykaŭ, havorycca ŭ spravazdačy.
«Vybarčy praces u dzień hałasavańnia byŭ acenieny pazityŭna na 95% vybarčych učastkach, dzie pravodziłasia nazirańnie, ale vialikaj kolkaści naziralnikaŭ nie dazvolili pravieryć śpisy vybarščykaŭ, a identyčnyja na vyhlad podpisy zafiksavanyja na 47 učastkach», — havorycca ŭ spravazdačy.
«Praces padliku hałasoŭ byŭ acenieny admoŭna na 30% vybarčych učastkaŭ, dzie pravodziłasia nazirańnie, što pakazvaje na značnyja prablemy. Praces sumavańnia vynikaŭ hałasavańnia byŭ acenieny jak niehatyŭny i pazbaŭleny prazrystaści na 25% vybarčych učastkaŭ, dzie byli naziralniki», - adznačajuć naziralniki BDIPČ ABSIE.
