U Žłobinie miascovaja milicyja amal paŭsutak trymała ŭ pastarunku dvuch maładych haradžanaŭ, jakija minułaj nočču na Palavoj vulicy napisali farbaj na asfalcie «Žyvie Biełaruś!». Aptymistyčny lozunh jany paŭtaryli ź dziasiatak razoŭ — ciaham čatyrochsot metraŭ.
Hramadzki aktyvist Anatol Papoŭ paviedamiŭ, što padviečar i Alaksandra, i Tarasa — tak zavuć maładych chłapcoŭ — adpuścili.
Suprać Alaksandra Je. składzieny administracyjny pratakoł — jamu pahražaje štraf. Taras pradstaŭleny ŭ hetaj historyi śviedkam. Kamunalniki za hety čas paśpieli zafarbavać čornaj maścikaj darožnaje hrafici.
Žyćcieśćviardžalnym nadpisam na asfalcie maładyja haradžanie adhuknulisia na papiaredniuju infarmacyju pra vyniki prezydenckich vybaraŭ.
Pa śviedčańni naziralnikaŭ, 11 kastryčnika paśla hałasavańnia i «pryčaščeńnia» ŭ bufetach tannaj harełkaj, niekatoryja haradžanie vyśviatlali, jaki kandydat u prezydenty lepšy. Da prykładu, kala ŭčastku № 29, jaki mieścicca ŭ fizkulturna-azdaraŭlenčym kompleksie BMZ, mužčyna napadpitku pahražaŭ prychilniku Taciany Karatkievič «pierahryźci horła». Z dapamohaj milicyi i hramadzkaści jaho ŭdałosia supakoić. Milicyja adnak nikoha nie zatrymlivała.
