Kitaj imkniecca pabudavać štučnyja vyspy ŭ Paŭdniova-Kitajskim mory, kab potym zajavić pretenzii na ekanamična i stratehična važnyja marskija rajony, paviedamlaje partał breakingdefense.com.
Adzin z ryfaŭ u archipiełahu Spratli ŭ krasaviku 2015 hoda
Hety ž ryf ŭ 2006 hodzie. Zdymki: breakingdefense.com
Faktyčna Kitaj pakryvaje marski cud pryrody tysiačami ton piasku i cemientu, budujučy tam vajenna-marskuju bazu z pryčałami i ŭźlotna-pasadačnymi pałosami.
«Isnujuć suśvietnyja pahrozy dla biaśpieki ŭ suviazi z hetaj škodaj (dla ekałohii). Imavierna, heta pryviadzie da skaračeńnia zapasaŭ ryby ŭ rehijonie, jaki ŭ śviecie najbolš zaležyć ad rybałoŭstva. Heta paškodzić stabilnaści ŭ rehijonie», — kaža prafiesar marskoj bijałohii i ekałohii ŭ Univiersitecie Majami Džon MakManus.
Ekśpierty nie mohuć dakładna vyznačyć škodu, jakaja naniesienaja ryfam, bo Kitaj nie dapuskaje tudy śpiecyjalistaŭ, adznačaje jon.
Kitaj zajaŭlaje, što pabudavanyja štučnyja vyspy znachodziacca ŭ jahonych terytaryjalnych vodach, takim čynam patrabujučy, kab lubyja čužyja vajennyja karabli znachodzilisia nie bližej za 12 marskich mil ad ich.
Archipiełah Spratli — sprečnaja terytoryja adrazu dla šaści dziaržaŭ: Vjetnama, Kitaja, Tajvania, Małajzii, Filipin i Brunieja. Akramia taho, što ryfy majuć vajennaje značeńnie, pad imi mohuć znachodzicca značnyja zapasy pryrodnaha hazu i nafty.
