U Biełarusi buduć budavać arendnaje žyllo dla trenieraŭ, jakija pracujuć z talenavitymi spartoŭcami. Takoje rašeńnie pryniaŭ Alaksandr Łukašenka siońnia na naradzie, pryśviečanaj pytańniam raźvićcia chakieja.
U čas narady razhladalisia prablemy, rašeńnie jakich dazvolić padniać na bolš vysoki ŭzrovień padrychtoŭku budučych zorak chakieja. Naprykład, adno z pryniatych na ŭzroŭni kiraŭnika dziaržavy rašeńniaŭ — budaŭnictva arendnaha žylla dla maładych trenieraŭ, jakija pracujuć z talenavitymi spartoŭcami. Klučavoje patrabavańnie Łukašenki — abapiracca treba na svaje, ajčynnyja spartyŭnyja talenty. Važna ŭmieć ich znajści i naležnym čynam padrychtavać.
Pytańni dalejšaha raźvićcia chakieja razhladalisia ŭ kompleksie. Da prykładu, pryniata rašeńnie, što pačynajučy z hetaha ci nastupnaha kvartała važniejšyja spartyŭnyja funkcyjaniery ŭ chakiejnym sporcie buduć pryznačacca tolki pa ŭzhadnieńni ź Fiederacyjaj chakieja.
Surjoznuju ŭvahu Łukašenka nadaŭ temie zahružanaści spartyŭnych abjektaŭ, raźvićciu masavaha sportu. Pakolki praktyčna paŭsiudna stvoranyja ŭmovy dla zaniatkaŭ fizkulturaj i sportam, to i ŭciahnutaści ŭ masavy sport treba nadavać bolšuju ŭvahu, bo havorka idzie pra takoje važnaje pytańnie, jak zdaroŭje nacyi.
I choć asnoŭnaja tema narady pryśviačałasia raźvićciu chakieja, faktyčna byli zakranutyja prablemnyja pytańni va ŭsich vidach sportu.