U pasolstvie Ukrainy ŭ Biełarusi 27 listapada adbyŭsia kruhły stoł «Mitrapalit Andrej Šaptycki (1865—1944) u historyi Ukrainy dy Biełarusi».
Jak byŭ źviazany ukrainski relihijny i palityčny lidar, pradstajaciel ukrainskaj hreka-katalickaj carkvy mitrapalit Šaptycki ź Biełaruśsiu? Jakoj była jahonaja rola ŭ adnaŭleńni hreka-katalickaj carkvy ŭ Biełarusi? Jak zachoŭvajecca i raźvivajecca duchoŭnaja spadčyna unijackaj carkvy ŭ Biełarusi siońnia? Pra heta havaryli ŭdzielniki kruhłaha stała, maderataram jakoha vystupiła doktar fiłasofii, doktar sakralnaj teałohii Iryna Dubianieckaja.
Udzielniki kruhłaha stała (źleva naprava): Jaŭhien Usošyn, Źmicier Čarniel, Ivan Daniłaŭ, Aleś Suša, Anatol Sidarevič, Dzianis Lisiejčykaŭ, Iryna Dubianieckaja. Fota Volhi Klaščuk, BiełaPAN
Da prysutnych źviarnuŭsia Časovy pavierany ŭ spravach Ukrainy ŭ Biełarusi Valery Džyhun.
Časovy pavierany ŭ spravach Ukrainy ŭ Biełarusi spadar Valery Džyhun. Fota Volhi Klaščuk, BiełaPAN
Historyk i palitołah Anatol Sidarevič svoj dakład «Mitrapalit Šaptycki i biełaruski nacyjanalny ruch» pryśviaciŭ supracoŭnictvu mitrapalita z bratami Ivanam i Antonam Łuckievičami. Nie ŭsie viedajuć, što mitrapalit inkohnita naviedvaŭ Biełaruś, šukajučy sposabaŭ adradžeńnia tut unijackaj carkvy.
Namieśnik dyrektara Nacyjanalnaj biblijateki Biełarusi, prezident Mižnarodnaj asacyjacyi biełarusistaŭ, kandydat kulturałohii Aleś Suša raspavioŭ pra rolu mitrapalita ŭ źbirańni i zachavańni kulturnaj spadčyny Biełarusi. Navukoviec pakazaŭ fotazdymki ekspanataŭ i katałožnych kartak byłoha biełaruskaha adździeła ŭ Lvoŭskim muziei Šaptyckaha. Jon prapanavaŭ naładzić bolš ciesnyja kantakty pamiž muziejnymi i knižnymi zborami Biełarusi i Ukrainy, arhanizavać u Biełarusi vystavu vydańniaŭ Skaryny, jakija zachoŭvajucca va Ukrainie.
Adna ź cikavostak — «Historyja Žyrovickaha abraza», 1622 h. Adna častka hetaha rukapisu zachoŭvajecca ŭ Biblijatecy Rasijskaj akademii navuk (BRAN), a druhaja — u Lvovie.
Namieśnik dyrektara Nacyjanalnaha histaryčnaha archiva Biełarusi, kandydat histaryčnych navuk Dzianis Lisiejčykaŭ pradstaviŭ dakumientalnuju spadčynu ŭnijackaj carkvy ŭ fondach Nacyjanalnaha histaryčnaha archiva Biełarusi, pakazaŭ fotazdymki archiŭnych dakumientaŭ, jakija ŭjaŭlajuć rarytetnuju kaštoŭnaść dla Ukrainy.
Malunak m. Makaraŭ Kijeŭskaha vajavodstva 1640-ja hh. Nacyjanalny histaryčny archiŭ Biełarusi. Fota Dzianisa Lisiejčykava.
Pra rolu mitrapalita Andreja Šaptyckaha ŭ adnaŭleńni hreka-katalickaj carkvy i jaje sučasny stan na Biełarusi raspaviali protapreśvitar, dekan Centralna-Zachodniaha dekanatu Biełaruskaj hreka-katalickaj carkvy, mahistr bahasłoŭja Jaŭhien Usošyn i ijeramanach-redemptaryst, mahistr bahasłoŭja Źmicier Čarniel.
Asabistymi ŭražańniami časoŭ svajho dziacinstva i partyzanskaha junactva padzialiŭsia Ivan Daniłaŭ, doktar miedycynskich navuk, piśmienik, publicyst. Jon vystupiŭ z pramovaj «Losy unijackich śviataroŭ u Zachodniaj Biełarusi pad čas prychodu savieckaj ułady ŭ 1939 hodzie. Vačyma vidavočcy». Daniłaŭ vyras u vioscy Drahičynskaha rajona, dzie da 1939 hoda była ŭnijackaja carkva.
U ramkach dyskusii staršynia respublikanskaha abjadnańnia ŭkraincaŭ «Vatra» Viktar Hutoŭski zaklikaŭ da abjektyŭnaj usiebakovaj acenki asoby i dziejnaści mitrapalita Andreja Šaptyckaha.
-
Iraničnaja archiŭnaja znachodka: malitva, jakaja nie źbierahła hałoŭnaha ateista Vialikaha Kniastva Litoŭskaha ad vohnišča
-
Znojdzieny ŭ biełaruskim archivie malunak raskryvaje tajamnicu zahadkavaha miača sa staražytnaha kurhana
-
Čamu na Biełarusi nasamreč niama 700-hadovych duboŭ i jak staražytnaja architektura dapamahaje batanikam
Ciapier čytajuć
Łojka pra budučaha pierajemnika Łukašenki: Adčuvajecca, što dziadula rychtujecca, prykidvaje i hladzić varyjanty7
Kamientary