1 śniežnia ŭ Homieli prajšła prezientacyja prajekta Jeŭrasajuza MOST (Mobility Scheme for Targeted People-to-People-Contacts/ Prahrama mabilnaści dla metanakiravanych mižasobasnych kantaktaŭ). Prajekt nakiravany na pašyreńnie kantaktaŭ pamiž hramadzianami ES i Biełarusi z metaj abmienu pieradavym vopytam i palapšeńnia parazumieńnia.
MOST daje mahčymaść naviedvać ES dla ŭstanaŭleńnia i pahłybleńnia prafiesijnych kantaktaŭ. Prajekt raźličany na 1.500 udzielnikaŭ ź Biełarusi i budzie realizavany da 2017 hoda. Jaho košt — amal 5 miljonaŭ jeŭra.
Klučavymi siektarami prajekta MOST źjaŭlajucca kultura, adukacyja i moładź, navuka i technałohii, a jaho metavymi krainami — členy Jeŭrapiejskaha sajuza. Udzielnikami prajekta apłačvajucca ŭsie raschody, źviazanyja z realizacyjaj pajezdki: transpart, pražyvańnie, charčavańnie, viza, strachoŭka i h.d.
Zajaŭki aceńvajucca hrupami ekśpiertaŭ, pry hetym kančatkovaje rašeńnie prymajecca Kirujučym kamitetam.
Prajekt MOST ažyćciaŭlajecca kansorcyumam, u skład jakoha ŭvachodziać Instytut imia Hiote ŭ Minsku (hałoŭny partnior) i Brytanski Saviet.
Na jaho prezientacyju ŭ Homiel prybyli kiraŭnik prajekta Frank Bauman, dyrektar Instytuta imia Hiote ŭ Minsku i kiraŭnik prajekta Kłaus Bajer.
Pavodle słoŭ Kłausa Bajera, hety prajekt pa-sapraŭdnamu źjaŭlajecca mostam pamiž Biełaruśsiu i ES; unikalnaść jaho ŭ tym, što zajaŭku moža padać kožny, chto dasiahnuŭ 18 hadoŭ. Kab vyznačyć, čyju zajaŭku varta padtrymać, stvorany hrupy ekśpiertaŭ jak u Biełarusi, tak i ŭ prymajučych krainach ES. Pieradusim prajekt nakiravany na padtrymańnie prafiesijnych kantaktaŭ pamiž Biełaruśsiu i ES.
Achvotnym udzielničać u prajekcie Kłaus Bajer rekamiendavaŭ płanavać hrupavyja pajezdki, da adnaho tydnia. Choć prajekt i praduhledžvaje pajezdki da čatyroch tydniaŭ, ale pa ekanamičnych pryčynach možna arhanizavać tolki 50—80 takich pajezdak. «Hałoŭnaje, kab heta byli prafiesijnyja kantakty — pasiadžeńni, kirmašy, kanfierencyi. Kali zajaŭku ŭchvalać — my akažam arhanizacyjnuju i finansavuju dapamohu. Kali vy zmožacie dakładna apisać mety, charaktarystyki vašaha mahčymaha partniorstva ŭ krainach ES, to nie vyklučana, što my dapamožam vam znajści partniora», — padkreśliŭ kiraŭnik prajekta.
MOST nie patrabuje viedaŭ zamiežnaj movy, adnak nie moža zabiaśpiečyć hrupy pierakładčykami. Tamu pryjezdžyja pavinny sami pakłapacicca ab tym, jak jany buduć kantaktavać za miažoj.
Na apracoŭku zajaŭki patrebna prykładna try miesiacy. Niekatoryja vizavyja centry zhadzilisia biaspłatna rabić vizy dla ŭdzielnikaŭ prajekta MOST, inšyja konsulstvy nie mohuć sabie heta dazvolić, i za vizu budzie płacić arhanizatar prajekta.
