Na čyhunačnym vakzale «Baranavičy-Paleskija» siońnia byli evakujavanyja 60 pasažyraŭ praź ničyjny pakiet u kasavaj zale, paviedamiŭ pieršy namieśnik načalnika Baranavickaha AUST Viktar Charytonaŭ.
Incydent adbyŭsia ŭ 13.05, kali narad milicyi źviarnuŭ uvahu na pakiet, što lažyć na padvakońni. Haspadara ručnoj pakłažy siarod tych pasažyraŭ, jakija siadzieli la vakna, nie znajšłosia. Miž tym na znachodku zreahavaŭ mietałašukalnik. «Ludziej pryjšłosia evakujavać. Budynak vakzała ačapili, z dapamohaj supracoŭnikaŭ DAI pierakryli ŭjezd na pryvakzalnuju płošču, vyklikali ŭsie nieabchodnyja ŭ takich vypadkach słužby — vybuchatechnikaŭ, supracoŭnikaŭ MNS», — paviedamiŭ padrabiaznaści pieršy namieśnik načalnika AUST.
Sapiory vyjavili, što ŭ pakiecie niama ničoha, što ŭjaŭlaje ź siabie niebiaśpieku. U im znachodzilisia pradukty charčavańnia, u tym liku pačak soku. Śpiecyjalisty miarkujuć, što mienavita na hetuju ŭpakoŭku i zreahavaŭ mietałašukalnik, bo ŭ jaje vytvorčaści vykarystoŭvajecca falha.
Usia apieracyja na čyhunačnym vakzale zaniała nie bolš za paŭhadziny. Zatrymak ciahnikoŭ na stancyi «Baranavičy-Paleskija» nie adbyłosia. Jak pakazali kamiery videanazirańnia, mierkavany haspadar pakieta kupiŭ bilet i pajechaŭ na dyzielnym ciahniku. Vyśvietlić jaho asobu pakul nie ŭdałosia. Zabytyja im rečy, pavodle pravił, pieradadzienyja dziažurnamu pa vakzale.
