Staršynia Jeŭrapiejskaha savieta Donald Tusk, kiraŭnik Jeŭrakamisii Žan-Kłod Junkier i viarchoŭny pradstaŭnik ES pa źniešniaj palitycy i palitycy biaśpieki Fiederyka Mahieryni adkazali na kalektyŭny list pradstaŭnikoŭ biełaruskaj apazicyi, paviedamlaje pres-słužba Abjadnanaj hramadzianskaj partyi.
Nahadajem, piać pradstaŭnikoŭ apazicyi nakiravali kiraŭnictvu Jeŭrasajuza i Jeŭraparłamienta list, jaki tyčycca ŭnutrypalityčnaj situacyi ŭ krainie i dalejšych adnosinaŭ ES i Biełarusi. Aŭtarami vystupili były palitźniavoleny Mikałaj Statkievič, lidar stvaranaha ruchu «Za dziaržaŭnaść i niezaležnaść Biełarusi» Uładzimir Niaklajeŭ, staršyni Biełaruskaj partyi levych «Spraviadlivy śviet» Siarhiej Kalakin i Abjadnanaj hramadzianskaj partyi Anatol Labiedźka, a taksama sustaršynia arhkamiteta pa stvareńni partyi «Biełaruskaja chryścijanskaja demakratyja» Pavieł Sieviaryniec.
List byŭ nakiravany 29 kastryčnika, kali ES pryniaŭ rašeńnie prypynić na čatyry miesiacy ekanamičnyja i vizavyja sankcyi ŭ dačynieńni da aficyjnaha Minska. «Sankcyi zamarožanyja, a što dalej? My nie pačuli ad Brusiela hałoŭnaha — što pavinny zrabić ułady za hetyja čatyry miesiacy», — prakamientavaŭ tady situacyju Labiedźka.
U svaim liście pradstaŭniki apazicyi prapanujuć realizavać pakrokavuju darožnuju kartu demakratyčnych źmienaŭ u Biełarusi i raźvićcia dyjałohu ź Jeŭrasajuzam. Pieršy punkt tyčycca źmieny vybarčaha zakanadaŭstva i jaho pravaprymianialnaj praktyki, kab ułady viarnuli biełarusam prava vybaru. Druhi — praduhledžvaje pieramoŭny praces z udziełam pradstaŭnikoŭ ułady i apazicyi pad ehidaj misii ABSIE. U trecim punkcie lista havorycca pra nieabchodnaść praviadzieńnia parłamienckich vybaraŭ 2016 hoda ŭ adpaviednaści z demakratyčnymi standartami.
Adrasaty lista padziakavali aŭtaram za źjaŭleńnie sumiesnaha pasłańnia i paviedamili, što jany «pryniali da viedama analiz situacyi». «Isnavańnie mocnaj apazicyi — heta žyćciovaja nieabchodnaść dla raźvićcia demakratyčnych i pluralistyčnych hramadstvaŭ. Vybarčaje zakanadaŭstva i pracedury, jakija adpaviadajuć mižnarodnym standartam, biezumoŭna, vielmi važnyja dla harantavańnia hramadzianam mahčymaści realnaha vybaru», — skazana ŭ liście ŭ adkaz.
U im taksama havorycca, što paśla publikacyi poŭnaj spravazdačy Biuro pa demakratyčnych instytutach i pravach čałavieka ABSIE pavodle vynikaŭ nazirańnia za prezidenckimi vybarami ŭ Biełarusi «ES budzie nadavać asablivuju ŭvahu hetym rekamiendacyjam i nastojliva zaklikać biełaruskija ŭłady da ich vykanańnia».
«Jeŭrasajuz anhažavany va ŭsiebakovyja adnosiny dla palapšeńnia jeŭrapiejska-biełaruskich adnosinaŭ i spadziajecca na bolš pazityŭny paradak dnia ź Biełaruśsiu, pavieličeńnie kantaktaŭ i śfier dla supracoŭnictva», — skazana ŭ liście pradstaŭnikoŭ ES. Jany adznačajuć, što aktyŭny ŭdzieł u pracesach demakratyzacyi hramadzianskaj supolnaści zastajecca najvažniejšym faktaram dla raźvićcia adnosinaŭ ES i Biełarusi.
Kamientujučy atrymany adkaz, staršynia AHP Anatol Labiedźka sam fakt lista acaniŭ stanoŭča. «Skancentravać uvahu jeŭrapiejskich palitykaŭ na Biełarusi niaprosta, u ES šmat inšych prablem i vyklikaŭ. Što da źmiestu, to jak pazityŭny faktar varta adznačyć supadzieńnie našych pazicyj pa pytańni svabodnych sumlennych vybaraŭ zhodna sa standartami ABSIE. Heta toj šlach, jaki moža pryvieści da pieramien u Biełarusi», — cytuje palityka pres-słužba partyi.
