«Kancepcyja kalandarnaj pradukcyi «Biełarusbanka» na nastupny hod zasnavana na zvarocie da minuŭščyny. Dvanaccać siužetaŭ kalendara ŭ fantazijnaj stylistycy fotakałaža ŭznaŭlajuć pryhožyja ramantyčnyja lehiendy z historyi našaj krainy.
Vizualizacyja ździejśniena praz adlustravańnie ŭ lusterku čaroŭnych panienak, vačami jakich my bačym toje, što adbyvałasia stahodździ tamu. Sivyja padanni, pryhožyja kazki, jaskravyja letapisy hučnych imionaŭ, što naradziła Biełaruś… Takim čynam, naša hłybinnaja, bahataja, pakrytaja tajamnicami historyja ažyvaje», — piša «Biełarusbank» u svaim pres-relizie.
Stylistyka rašeńnia ilustruje poviaź časoŭ, vyznačalnaść dnia siońniašniaha i budučyni praź minułaje. Na kožnaj staroncy – supravadžalnyja teksty, pa krupinkach sabranyja z samych roznych krynic. Kalandar vymušaje zachaplacca admietnaściu biełaruskaj historyi i, treba dumać, natchniaje žadańniem bolš daviedacca, čym žyli našy prodki.
«Meta najbujniejšaha banka krainy – nie tolki zadavać ton va ŭdaskanaleńni technałohij i finansavych servisaŭ, nie mienš važnaja misija dla nas – źbierahčy skarby, jakija nie majuć niepasrednych adnosin da kaštoŭnaściej materyjalnych, – zapeŭnivaje staršynia praŭleńnia AAT «AAB Biełarusbank» Siarhiej Pisaryk. – Heta naša dziŭnaja historyja i samabytnaść, naša słaŭnaje minułaje, honar za jakoje napaŭniaje nas siłami, upeŭnienaściu i hatoŭnaściu da novych ździajśnieńniaŭ i pieramoh».
Histaryčnyja anały ŭtrymlivajuć sotni słaŭnych imionaŭ, vobrazaŭ, piersanažaŭ kazak, lehiend i realnych padziej, jakija niespraviadliva zabytyja. Zadača sučaśnikaŭ – adradzić i zachavać skarby minuŭščyny. U banku ličać, što dla hetaha možna vykarystoŭvać roznyja srodki, u tym liku kalandarnaja pradukcyja. Tak źjaviŭsia prajekt «Adlustravańnie», jak śviedčańnie biezumoŭnaj cikavaści «Biełarusbanka» da nacyjanalnaj historyi i kultury.
Kancepcyju prapanavała kreatyŭnaje ahienctva «Forte Grey», a realizavała pradakšn-studyja «Partizan Production».
Pahladzieć usie fota z podpisami možna pa spasyłcy vyšej.
