Pytańnie ab padatkaabkładańni Nobieleŭskaj premii Śviatłany Aleksijevič pavinna vyrašacca ŭ ahulnym paradku, zajaviŭ 10 śniežnia načalnik adździeła infarmacyjna-tłumačalnaj pracy — pres-sakratar Ministerstva pa padatkach i zborach Siarhiej Škut.
Pavodle jaho słoŭ, suma premii, atrymanaj piśmieńnicaj, — «heta ŭzajemaadnosiny Aleksijevič i padatkovych orhanaŭ», i ŭ jaje jość prava, jak i va ŭsich hramadzian, da 1 sakavika 2016 hoda padać padatkovuju dekłaracyju, u jakoj ukazać u tym liku sumu premii, i zapłacić padachodny padatak, staŭka jakoha składaje 13%.
Ciapier, udakładniŭ Škut, ilhot, jakija datyčacca Nobieleŭskaj premii, u biełaruskim Padatkovym kodeksie niama, jość tolki lhoty ŭ dačynieńni da dziaržaŭnych i prezidenckich premij. Isnuje mahčymaść ustanaŭleńnia indyvidualnych padatkovych ilhot ukazam prezidenta, ale heta nie ŭvachodzić u kampietencyju MPZ, padkreśliŭ pres-sakratar.
Cyrymonija ŭručeńnia Nobieleŭskaj premii biełaruskaj piśmieńnicy Śviatłanie Aleksijevič adbudziecca ŭ Stakholmie siońnia, pačatak — u 18.30 pa minskim časie.
Fond Nobiela byŭ stvorany ŭ 1900 hodzie jak pryvatnaja niezaležnaja niaŭradavaja arhanizacyja z pačatkovym kapitałam 31,6 młn šviedskich kron (u ciapierašnich cenach heta suma ekvivalentnaja prykładna 1,65 młrd kron). Pieršyja premii składali 150 tysiač kron. Ciapier premija składaje 8 młn kron, ci 953 tysiač dalaraŭ ZŠA.
