25 śniežnia Rastvo (Naradžeńnie Chrystova, Kalady) śviatkujuć nie tolki kataliki i pratestanty. A taksama bolšaść pravasłaŭnych kananičnych (h.zn. kłasičnych) cerkvaŭ.
Tak, 25 śniežnia Rastvo śviatkujuć Kanstancinopalskaja (aproč Afona), Ałbanskaja, Antyjachijskaja, Aleksandryjskaja, Kiprskaja, Bałharskaja, Rumynskaja, Češskaja i Słavackaja, Estonskaja apostalskaja, Eładskaja (Hrečaskaja) pravasłaŭnyja cerkvy.
7 studzienia Rastvo śviatkujuć kananičnyja Ruskaja, Sierbskaja, Jerusalimskaja, Hruzinskaja cerkvy, UPC Kijeŭskaha patryjarchata, niekananičnyja Makiedonskaja, Čarnahorskaja, šerah pravasłaŭnych ekzarchataŭ u ZŠA, Biełaruskaja aŭtakiefalnaja, a z 2014 h. Polskaja aŭtakiefalnaja pravasłaŭnaja, hrečaskija starastylniki. 7 studzienia Rastvo śviatkujuć ukrainskija i rasijskija hreka-kataliki.
Admietna, što pravasłaŭnyja cerkvy, što śviatkujuć Rastvo 25 śniežnia, karystajucca nie hryharyjanskim kalendarom,
a novajulijanskim, raspracavanym u 1923 h. prafiesaram matematyki i niabiesnaj miechaniki Białhradskaha ŭniviersiteta, astranomam Miłucinam Miłankavičam.
Da 28 lutaha 2800 h. novajulijanski kalandar budzie supadać z hryharyjanskim.
Cikava, što ŭ 1923 h. patryjarch Cichan uvioŭ u RPC novajulijanski kalandar, ale niezadavalnieńnie ŭ carkvie vymusili patryjarcha adkłaści rašeńnie na niapeŭny termin.
Darečy, Vialikdzień hetyja cerkvy adznačajuć pavodle julijanskaha kalendara.
Mažliva, dla pravasłaŭnych u Biełarusi (jakija karystajucca julijanskim kalendarom) taksama było b varta pierajści na novajulijanski kalandar, kab Kalady adznačać z usim śvietam 25 śniežnia, a Vialikdzień — pavodle julijanskaha kalendara?
Biezumoŭna, usio ŭpirajecca ŭ pazicyju RPC, jakaja faktyčna kiruje biełaruskimi prychodami ŭ krainie. A jak tam vyrašać, tak i budzie.