Mitrapalit Pavieł pieraličyŭ pravasłaŭnyja chramy, u jakich prachodziać słužby na biełaruskaj movie i raspavioŭ, u jakim vypadku ich stanie bolš. Pytańnie pra toje, ci jość u płanach pravasłaŭnych śviataroŭ nabaženstvy na biełaruskaj movie, było zadadziena kiraŭniku BPC padčas anłajn-kanfierencyi na sajcie Biełteleradyjokampanii.
Fota Vadzima Zamiroŭskaha, Tut.by
— Vy viedajecie, u nas jość chramy takija, dzie liturhija ździajśniajecca na biełaruskaj movie, — adznačyŭ mitrapalit Pavieł. — Ja skažu, što navat byli sproby naohuł pierajści na biełaruskuju movu ŭ niekatorych chramach, ale jany nie atrymali svajho raźvićcia, tamu što ludzi ŭžo pryvykli da carkoŭnasłavianskaj. Choć nas sprabujuć abvinavacić u tym, što voś — ruskaja mova. Ale heta nie ruskaja mova, my ździajśniajem nabaženstvy na carkoŭnasłavianskaj, i heta navat nie starasłavianskaja. Heta mova kanca XIX — pačatku XX stahodździa. I jana zrazumiełaja siońnia nam — tym, chto ŭvažliva prysłuchoŭvajecca da słoŭ malitvy.
Kiraŭnik BPC śćviardžaje, što sproby niekatorych chramaŭ pierajści na biełaruskamoŭnyja nabaženstvy nie znachodzili padtrymki ŭ viernikaŭ i «ludzi prosta pierastavali chadzić tudy».
— Ale, tym nie mienš, u nas u Pietrapaŭłaŭskim sabory ŭ Minsku ździajśniajecca pa subotach liturhija na biełaruskaj movie, u Michajłaŭskim prychodzie ŭ Minsku — adzin raz u miesiac, i dva razy na miesiac — u chramie Śviaciciela Kiryły Turaŭskaha pry duchoŭnaj akademii. Tak što, chto žadaje — prychodźcie, - zaprasiŭ na biełaruskamoŭnyja nabaženstvy kiraŭnik pravasłaŭnaj carkvy ŭ Biełarusi. — U nas niama zabarony. Kali budzie pažadańnie, kali buduć ludzi prychodzić - tady, viadoma, my budziem malicca (na biełaruskaj).
Ź inšaha boku, mitrapalit ličyć, što vykazvańni nakštałt «nie chadžu ŭ carkvu, bo niama liturhij pa-biełarusku» — apraŭdańnie čałaviečaj lanoty.
