U kitajskaj pravincyi Chenań razburyli 36-mietrovuju statuju Mao Czeduna, budaŭnictva jakoj zaviaršyłasia 5 studzienia. Pra heta piša Bangkok Post.
Pa słovach miascovych čynoŭnikaŭ, pryčyna, pa jakoj manumient było vyrašana źnieści, niezrazumiełaja. Pa viersii vydańnia, prajekt nie nabyŭ naležnaha adabreńnia z boku ŭrada, pry hetym nie ŭdakładniajecca, čamu jaho aŭtary nie prakansultavalisia z kiraŭnictvam krainy pierad pačatkam rabot.
Na budaŭnictva pomnika ź bietonu i stali, pakrytaha załatoj farbaj, było zatračana try miljony juaniaŭ (kala 460 tysiač dalaraŭ). Srodki źbirali žychary vioski ŭ paviecie Tunsiuj, kala jakoj i znachodziłasia statuja Vialikaha Styrnavoha. Mierkavałasia, što manumient zmoža pryciahnuć u rehijon turystaŭ.
Kamientujučy navinu pra źjaŭleńnie statui, karystalniki kitajskich sacsietak vyśmiejvali fatahrafii bietonnaha Mao. Tak, jany pisali, što pomnik nibyta nie padobny na dziaržaŭnaha dziejača, a niefarmalny błoh pra žyćcio ŭ Kitai Shanghaiist źviartaŭ uvahu na toje, što kala noh Vialikaha Styrnavoha znachodzicca druhaja hałava.
Mao Czedun — kitajski palityčny dziejač, jaki kiravaŭ KNR z momantu jaje zasnavańnia ŭ 1949 hodzie i da svajoj śmierci ŭ 1976-m. Budučy kamunistam, Mao mierkavaŭ, što Kitaju nieabchodna asablivaja viersija kamunistyčnaj daktryny, stvareńniem jakoj jon i zajmaŭsia. Siońnia ŭ KNR dziejnaść Vialikaha Styrnavoha aficyjna aceńvajecca nastupnym čynam: 70 pracentaŭ pieramoh i 30 pracentaŭ pamyłak.
Kamientary