 |
Kamitet architektury i horadabudaŭnictva Mienskaha harvykankamu daŭ abiacańnie pryciahvać hramadskaść da abmierkavańnia prajektaŭ rekanstrukcyi i restaŭracyi histaryčnaha centru stalicy, u tym liku prajektu adnaŭleńnia Mienskaha zamčyšča XI—XVII stahodździaŭ. Pra heta havorycca ŭ adkazie na adozvu staršyni Biełaruskaha dobraachvotnaha tavarystva achovy pomnikaŭ historyi i kultury Antona Astapoviča da prezydenta krainy z prośbaj ab jaho asabistym udziele ŭ vyrašeńni prablemy rekanstrukcyi histaryčnaha centru Mienska.
U adoźvie ad 27 lutaha, u pryvatnaści, paviedamlałasia, što člen abjadnańnia architektar‑restaŭratar Uładzimier Papruha raspracavaŭ kompleksny prajekt adnaŭleńnia histaryčnaha centru stalicy, nakiravany ŭ Mienharvykankam. Aŭtar adozvy vykazaŭ zaniepakojenaść niežadańniem haradzkich uładaŭ abmiarkoŭvać hety prajekt z hramadskaściu, a taksama abyjakavaściu kantrolnych i nahladnych orhanaŭ da šmatlikich parušeńniaŭ narmatyŭna‑pravavoj bazy pa achovie historyka‑kulturnaj spadčyny, jakija nabyvajuć u stalicy tatalny charaktar.
U svaim liście čynoŭniki Mienharvykankamu zaznačajuć, što asobnyja častki prajektu U.Papruhi (materyjały kompleksnych navukovych daśledavańniaŭ, hrafičnaja rekanstrukcyja zhublenych elementaŭ staradaŭniaj zabudovy i planiroŭki) «mohuć źjavicca asnovaj» raspracovak pa adnaŭleńni terytoryi histaryčnaha centru na nastupnych stadyjach prajektavańnia.
Razam z tym, čynoŭnikam ujaŭlajecca sprečnym šerah prapanoŭ prajektu pa rekanstrukcyi transpartnaj schiemy horadu.
«Uličvajučy, što nazvanyja prapanovy pradstaŭleny ŭ kanceptualnym varyjancie i nie padmacavany transpartnymi raźlikami i analizam isnujučaj inžynernaj infrastruktury, acanić mahčymaść ich realizacyi dastatkova składana», — zaznačajecca ŭ liście.
U interviju BiełaPAN A.Astapovič zajaviŭ, što hetaja zaŭvaha nie adpaviadaje rečaisnaści, pakolki ŭ tłumačalnaj zapiscy da svajho prajektu U.Papruha pryvioŭ «usie nieabchodnyja abhruntavańni i raźliki».
«Apelacyja hramadztva da čynoŭnikaŭ pa pytańniach adnaŭleńnia histaryčnaha centru stalicy, a taksama pa inšych prablemach u halinie źbieražeńnia pomnikaŭ ajčynnaha dojlidztva śviedčyć ab tym, što dziaržaŭnaja palityka ŭ sfery achovy historyka‑kulturnaj spadčyny nakiravana na jaje źniščeńnie», — ličyć A.Astapovič.
