Pahrozy rasiejskaha prezydenta rasčlanić Ukrainu, pra jakija źjaviłasia infarmacyja ŭčora, vyklikali strymanuju reakcyju ŭ palityčnych kołach Ukrainy.
Juščanka: suverenitet i NATO -- tojesnaść
Na dumku priezydenta Ukrainy Viktara Juščanki, "palityčny suverenitet Ukrainy i siabroŭstva ŭ NATO – heta tojesnaść". Nie kamentujučy naŭprost vykazvańniaŭ Pucina, jon adnak nahadaŭ u interviju telekanału “Inter”, što za hady niezaležnaści va Ŭkrainy naźbirałasia mnoha niavyrašanych pytańniaŭ adnosna demarkacyi miažy z Rasiejaj, delimitacyi akvatoryj Azoŭskaha i Čornaha moraŭ, Kierčanskaha pralivu, jość pytańni pa vostravie Źmiainym i pa kasie Tuzła.
Razam z tym, Juščanka jašče raz vykazaŭ zadavalnieńnie vynikami dla Ŭkrainy samitu NATO ŭ Buchareście, nazvaŭšy jaho histaryčnym. Juščanka prahnazuje ŭ 2010 h. usieŭkrainski referendum pa ŭstupleńni Ŭkrainy ŭ NATO i vykazvaje upeŭnienaść, što na im hramadzianie Ŭkrainy prymuć pazytyŭnaje rašeńnie.
Nahadajem, na samicie ŭ Buchareście siabry NATO pieranieśli kančatkovaje rašeńnie pra dałučeńnie Ŭkrainy da Planu dziejańniaŭ pa siabroŭstvie (PDS) na śniežań 2008. Razam z tym u rezalucyi samitu havorycca, što Aljans harantuje pryjom Ukrainy ŭ skład NATO.
“Heta ŭmiašalnictva va ŭnutranyja spravy”
Siabar kamitetu pa pytańniach eŭraintehracyi Viarchoŭnaj Rady Ŭkrainy Andrej Škil adznačyŭ, što takija zajavy ukrainskija ŭłady rasceńvajuć jak umiašalnictva va ŭnutranyja spravy Ŭkrainy. "Meta hetych pahroz adna -- nia vypuścić Ukrainu z zamiežnapalityčnaj arbity Rasiejskaj Federacyi. Ale kali my znojdziem choć by adno paćvierdžańnie taho, što Rasieja ŭmiešvajecca ŭ našy spravy nia tolki na verbalnym uzroŭni, naša reakcyja budzie adekvatnaj", -- padkreśliŭ jon.
“Pucin – persona non hrata”
Kanhres ukrainskich nacyjanalistaŭ rasceńvaje słovy Pucina jak "biesprecedentnaje nachabstva i zamach na cełasnaść i suverenitet Ukrainy". KUN źviarnuŭsia da Rady biaśpieki Ŭkrainy z prośbaj nadać Pucinu status persony non hrata i zabaranić vykarystoŭvać pavietranuju prastoru Ŭkrainy.
“Heta nia toje pytańnie, jakoje moža raskałoć krainu”
Namieśnik kiraŭnika frakcyi Rady "Naša Ukraina - Narodnaja samaabarona" Taras Stećkiŭ adznačyŭ: "Ukraina dałučycca da PDČ, heta vidavočny fakt. I nijakaha raskołu nia budzie, heta nia toje pytańnie, jakoje moža raskałoć krainu. Meta hetych razmovaŭ - zapałochać. A Rasiei ja b paraiŭ pryniać jak dadzienaść, što Ŭkraina budzie ŭ NATA".
Frakcyja "Naša Ukraina - Narodnaja samaabarona" paprasiła ŭłady zrabić zapyt, kab MZS Rasiei paćvierdziła, što Pucin sapraŭdy zrabiŭ takuju zajavu, abo abvierhła hety fakt.
