U CHMAA (Chanty-Mansijskaja aŭtanomnaja akruha, subjekt RF) namieciłasia strašnaja tendencyja — ludziej, jakija zmahajucca suprać karupcyi i vystupajuć z krytykaj ułady, sprabujuć zasadzić u psichijatryčnyja balnicy. U liku paciarpiełych užo niekalki čałaviek.
medicinalive.com
Jak stała viadoma RBK Ciumień, dniami na paŭtornaje prymusovaje abśledavańnie nakiravali žycharku Kahałyma, maci dvaich dziaciej Łarysu Rafikavu. Žančyna viadomaja tym, što zmahałasia suprać karupcyi ŭ śfiery ŽKH horada. Pavodle jaje słoŭ, ułaśnikam žylla šlacham šantažu naviazvajuć kampanii, afilavanyja z haradskimi čynoŭnikami (staŭlenikami kampanii «Łukojł»), jakija potym vystaŭlajuć ničym nie paćvierdžanyja vielizarnyja rachunki za kamunalnyja pasłuhi. Łarysa sumiesna ź inšymi hramadskimi aktyvistami Kahałyma adpraviła sotni skarhaŭ i zajaŭ u roznyja instancyi (u tym liku siłavyja), sustrakałasia z hubiernataram Kamarovaj, adnak nichto na situacyju naležnym čynam nie adreahavaŭ. Bolš za toje, čynoŭnikami było raspačataje sapraŭdnaje ckavańnie Rafikavaj. U rospačy ŭ siaredzinie žniŭnia minułaha hoda žančyna napisała kiraŭniku Juhry list, u jakim zajaviła, što kali jaje nie spyniać treciravać i nie raźbiarucca narešcie z prablemaj, to ŭ vieraśni, u Dzień horada jana ździejśnić akt samaspaleńnia na centralnaj płoščy.
Napiaredadni śviata pozna viečaram pad vydumanaj padstavaj Łarysu vymanili z kvatery ŭčastkovyja i pavieźli za 250 km u Surhucki psichanieŭrałahičny dyspansier. Padstavaj dla prymusovaj špitalizacyi stała zaklučeńnie niejkaha kahałymskaha psichijatra Purtava. Muža Rafikavaj, jaki sprabavaŭ pieraškodzić zatrymańniu žonki, źbili i ŭdaryli elektrašokieram. Paboi źniatyja, zajavy ŭ orhany napisanyja, adnak adkaznaści nichto da hetaha času nie panios.
«Na ščaście, u dyspansiery mianie pryniaŭ adekvatny doktar. Jon spytaŭ: «Što zdaryłasia?». Ja patłumačyła, što vystupiła suprać ułady. Jon, zrazumieŭšy, kiŭnuŭ. U vyniku kamisija lekaraŭ-psichijatraŭ, jakaja abśledavała mianie, nie vyjaviła prykmietaŭ, jakija b źjaŭlalisia padstavaj dla majoj niedobraachvotnaj špitalizacyi», — raspaviała RBK Ciumień Łarysa Rafikava (kopii ŭsich dakumientaŭ i daviedak majucca ŭ redakcyi).
Adnak heta nie ŭzradavała miascovych čynoŭnikaŭ. Na dniach Łarysie dasłali nakiravańnie na novaje prymusovaje abśledavańnie. Žančyna naŭmysna źjechała prachodzić jaho za miežy akruhi — u Maskvu, u Dziaržaŭny navukovy centr sacyjalnaj i sudovaj psichijatryi im. U.P. Sierbskaha. Jana ŭpeŭnienaja, što ŭ Juhry jaje b niezakonna pryznali psichična chvoraj.
Heta daloka nie adzinkavy vypadak u Juhry, kali hramadzianie z zanadta aktyŭnaj žyćciovaj pazicyjaj «likvidujucca» takim sposabam. U padobnuju situacyju trapiŭ i žychar Juhorska Alaksiej Chmialeŭski — praz sud mužčynu sprabujuć pryznać psichična nieŭraŭnavažanym. Jak piša ahienctva URA.Ru, juharčanin zapeŭnivaje: heta pomsta z boku miedycynskaj supolnaści i ŭładaŭ. U pačatku vosieni Alaksiej padčas rabočaj pajezdki hubiernatara Kamarovaj u Juhorsk raskazaŭ kiraŭniku rehijonu pra prablemy ŭ miascovaj achovie zdaroŭja. Dastałosia ŭładam municypaliteta i navat prakuratury.
U Chmialeŭskaha prablemy sa zdaroŭjem — hipiertanija treciaj stupieni. Składanaści i ŭ jaho žonki Haliny — bolš za hod u jaje byli prablemy z rukoj i nahoj, ale dyjahnaz pastavić lekary tak nie zmahli. Mužčyna zapeŭnivaje, što dapamoha akazvajecca nie ŭ poŭnym abjomie, a na ŭsie jaho zajavy — i ŭ administracyju, i ŭ pravaachoŭnyja orhany — nichto nie reahuje.
Mienavita pra heta Chmialeŭski raspavioŭ Kamarovaj. U Juhorskaj haradskoj balnicy prajšła pravierka, pa vynikach jakoj hałoŭny doktar Uładzimir Bykaŭ straciŭ pasadu. Razam z tym Bykaŭ źjaŭlajecca dziejučym deputatam haradskoj dumy — ź jaho padačy, upeŭnieny juharčanin, i pačałasia historyja ź psichdyjahnazam.
«Zahadčyca miascovaj juhorskaj psichuški Siavidava padała pazoŭ u sud ab prymusovym ahladzie, užo i psichičny dyjahnaz vystaviła. Usiakaja jeraś u hetym pazovie napisana. I što pahrozu balnicy ja ŭjaŭlaju, i što skarhi ab drennym lačeńni — heta śviedčańnie tryźnieńnia. Heta značyć tyja, chto niezadavoleny lačeńniem u juhorskaj balnicy, — varjaty», — cytuje Chmialeŭskaha URA.Ru.
Pavodle jaho słoŭ, na jaho napisali skarhu niekalki lekaraŭ. Nibyta mužčyna navat pahražaŭ im zabojstvam, i mienavita heta stała pryčynaj dla prymusovaj pravierki psichičnaha zdaroŭja juharčanina. U sudzie pieršaj instancyi ŭstali na bok dyspansera. Ciapier razhladajecca apielacyja. Kali ŭ akruhovym sudzie taksama pahodziacca ź nieabchodnaściu prymusovaj ekśpiertyzy, Chmialeŭskaha dastaviać u psichanieŭrałahičny dyspansier. Žychar Juhorska aścierahajecca, što jamu pastaviać taki dyjahnaz, paśla jakoha nijakija skarhi hubiernataru ŭžo nie dapamohuć.
Juharčanin užo prajšoŭ niezaležnuju ekśpiertyzu ŭ Jekaciarynburhu, jakaja pakazała, što nijakich adchileńniaŭ u jaho niama. Chmialeŭski źviartaŭsia i ŭ akruhovy departamient achovy zdaroŭja, i navat u ministerstva. Adnak pakul jon nie ŭpeŭnieny, što budzie niejkaja reakcyja.
Jašče adzin paciarpieły ŭ baraćbie z uładaj — były piedahoh Chanty-Mansijskaha technołaha-piedahahičnaha kaledža Śviatłana Šyler. Žančyna vyniesła na publičny ahlad šakavalnyja mietady raboty navučalnaj ustanovy. Pavodle jaje słoŭ, piedahohi atrymlivali zarobak za fiktyŭnyja subotnija zaniatki, jakich na samoj spravie nie pravodzili na praciahu čatyroch hadoŭ. Bolš za toje, byli vypadki, kali jany zavyšali acenki i zdavali ekzamieny za studentaŭ, kab prademanstravać vysoki ŭzrovień adukacyi i atrymać dadatkovaje finansavańnie. Razhareŭsia skandał, adnak zamiest dyrektara pryjšłosia zvolnicca samoj Śviatłanie — jana nie vytrymała cisku, jaki na jaje pačali akazvać nie tolki kalehi, ale i hubiernatar.
«Na asabistym pryjomie Natalla Kamarova skazała mnie: «Kali b ja była vašym dyrektaram, ja b taksama nie zmahła z vami pracavać. Kaža: «Čamu adrazu da mianie nie pryjšli?» Ja adkazvaju: «Ja ŭžo piaty raz u vas». Jana: «Kožny čałaviek niasie svoj kryž. Ja svoj, a vy svoj». Natalla Uładzimiraŭna, vy ŭžo vyznačyciesia, ci to prychodzić mnie da vas, ci to kryž nieści? A jaki mnie kryž nieści? Ja pryjšła piedahoham, ubačyła parušeńni, pra jakija i skazała. Mnie vielmi baluča za svaju prafiesiju. Ja budu stukacca va ŭsie dźviery da kanca, pakul nie dastukajusia, pakul nie pačujuć!» — kaža Śviatłana Šyler.
U vyniku dyrektara kaledža ŭsio ž zvolnili, ale Śviatłanie Šyler tak i nie dali pracavać u inšych miescach — čynoŭniki nie dazvalajuć pracadaŭcam pracaŭładkoŭvać parušalnicu ich spakoju.
Pry sprobie ŭładkavacca na adno ź miescaŭ pracy ad piedahoha zapatrabavali prajści miedahlad, choć termin dziejańnia papiaredniaha jašče nie minuŭ. «Ja, ničoha nie padazrajučy, atrymała nakiravańnie, jakoje mnie vydali ŭ adździele kadraŭ, i adpraviłasia ŭ paznačanuju kliniku «Sibirskaje zdaroŭje». Tam adzin ź lekaraŭ šapnuŭ mnie: «Suprać vas niadobraje płanujuć, vas nie dapuściać zajmacca piedahahičnaj dziejnaściu, nasalili vy mocna kiraŭnictvu». U vyniku spačatku nieŭrołah skazaŭ mnie: «U vas asteachandroz i drenny zrok, vy nie možacie pracavać piedahoham». Ja była źbiantežanaja — u mianie 100-pracentny zrok, ja nie našu akularaŭ i kiruju aŭtamabilem, a asteachandroz u nas u pałovy piedahohaŭ. Potym mnie skazali, što ja pavodžu siabie, jak nienarmalnaja, daviedku davać nie chacieli», — raspaviała RBK Ciumień Śviatłana Šyler.
Jana paviedamiła hałoŭdoktaru, što kali joj daduć zaklučeńnie, jakoje zabaraniaje zajmacca piedahahičnaj dziejnaściu, jana pieršym ža rejsam vylecić u Maskvu, kab prajści miedahlad tam. Tolki paśla hetaha zaklučeńnie było vydadzienaje.
Zrešty, na pracu Śviatłanu Šyler tak nichto i nie biare. «Takoje rasparadžeńnie hubiernatara Kamarovaj. Usie pra heta viedajuć. Mianie navat lekary papiaredzili, što Kamarova zamovu dała na moj dyjahnaz, jaki b zabaraniŭ mnie zajmacca piedahahičnaj dziejnaściu. Ja dumaju źjazdžać z Chanty-Mansijska, sił tryvać heta bolš niama. I nie ja adna. «Represavanych» užo vielmi šmat. I ŭsie źjazdžajuć siemjami. Žyć u CHMAA stała vielmi niebiaśpiečna», — reziumavała Śviatłana Šyler.
