Rasijskaje vydańnie «Sobiesiednik» daviedałasia, što byłaja pieršaja łedzi Rasii Ludmiła Pucina źmianiła proźvišča.
Uładzimir i Ludmiła Puciny abviaścili ab svaim razvodzie ŭ lipieni 2013 hoda, i paśla heta žančyna źjaviłasia na publicy tolki adnojčy.
Viasnoj 2014 hoda jana vystupiła na cyrymonii ŭručeńnia Horkaŭskaj litaraturnaj premii. Hetaja premija zasnavanaja vydavieckim domam «Litaraturnaja vučoba» — daččynaj kampanijaj Centra raźvićcia mižasobasnych kamunikacyj (CRMK). Uznačalvaje abiedźvie hetyja struktury 37-hadovy Artur Ačaretny.
Ad siaredziny 2000-ch małodšaja siastra Ludmiły Pucinaj uznačalvała kampaniju «Interjerservis», blizkuju da CRMK. Pavodle dadzienych rasijskaha rejestra jurydyčnych asobaŭ, ź vieraśnia 2014 zasnavalnikam kampanii stała Ludmiła Alaksandraŭna Škrabniova.
Dziavočaje proźvišča byłoj žonki Pucina — Škrabniova. Atrymlivajecca, paśla razvodu Pucina viarnuła sabie dziavočaje proźvišča?
Adnak vyhladaje, što ŭ takim statusie jana była niadoŭha.
U studzieni 1995 hoda siamja Pucina stała ŭładalnicaj 139-mietrovaj kvatery ŭ Sankt-Pieciarburhu. Adnak praz try hady paśla ich pierajezdu ŭ Maskvu pravy na nieruchomaść byli pieraaformleny na Kaciarynu Škrabniovu, ciešču Uładzimira Pucina.
Nastupnaja źmiena ŭłaśnikaŭ adbyłasia ŭžo ŭ lipieni 2015-ha. Pa pravie spadčyny kvatera pierajšła da siastry Ludmiły Pucinaj Volhi Camajevaj, a ad jaje pa damovie kupli-prodažu — da Ludmiły Alaksandraŭny… Ačaretnaj.
U vypiscy z rejestra miesca i data naradžeńnia Ačaretnaj supadajuć z dadzienymi Ludmiły Alaksandraŭny Pucinaj.
Artur Ačaretny nie staŭ adkazvać na piśmovy zapyt nakont svajho mahčymaha šlubu.
Fota: Artur Ačaretny/Facebook
Rasijskija žurnalisty źviartajuć uvahu, što «Centr raźvićcia mižasobasnych kamunikacyj» atrymlivaŭ ščodryja hrošy ad dziaržaŭnych kampanij, u tym liku «Tranśniefti». U hetym ža centry pracaŭładkavanyja niekatoryja inšyja asoby, źviazanyja ź siamjoju Pucina.
