Ale spaborničać z «Movaj Nanova», «MovaViedaj» i «Mova.tut» jany nia buduć.
«Mova ź Imbrykam» — tak nazvaŭ kursy biełaruskaj movy pradprymalnik, raspaŭsiudnik biełaruščyny i ŭładalnik internet-kramy biełaruskich tavaraŭ Imbryk.by Aleś Mazanik.
Prajekt možna nazvać internacyjanalnym — kursy buduć prachodzić u Miensku i Vilni.
24 studzienia ŭ Domie nacyjanalnych mienšaściaŭ u Vilni ŭžo adbyłasia prezentacyja novych kursaŭ. U Miensku prajekt startuje 26 studzienia — u Art Siadzibie.
«Kursy biełaruskaj movy «Mova ź Imbrykam» majuć niefarmalny, zabaŭlalny charaktar. Jany bolš prydatnyja dla adpačynku, čym dla surjoznaha vyvučeńnia movy. U Vilni žyvie šmat biełarusaŭ, jakija dobra vałodajuć biełaruskaj movaj. Dla ich kursy stanuć placoŭkaj, dzie možna sabracca, kab viesieła i karysna pravieści čas razam z surodzičami. Uvohule ideja takaja — i heta tyčycca i vilenskich, i mienskich kursaŭ — kab ludzi roznych prafesijaŭ raspaviadali, jak biełaruskaja mova dapamahaje im u štodzionnaj pracy. Heta kursy dla abmienu dośviedam, choć kožny zaniatak budzie mieć i temu, i prahramu.
Kali ja ŭpieršyniu pryjechaŭ u Vilniu, ja byŭ mocna ździŭleny tym, što ŭ horadzie, dzie ledź nia kožny miesiac byvaje kožny śviadomy biełarus, niama ničoha stałaha pa-biełarusku, kab čałaviek pryjechaŭ i viedaŭ, što raz na tydzień jon moža trapić na niejkaje mierapryjemstva. Paraiŭšysia z pradstaŭnikami Tavarystva biełaruskaj kultury ŭ Litvie, ja vyrašyŭ, što kursy biełaruskaj movy mohuć być dobrym varyjantam», — raspavioŭ Aleś Mazanik Svabodzie.
Što da mienskich kursaŭ biełaruskaj movy, to Aleś Mazanik ličyć, što nia stvoryć kankurencyi «Movie Nanova», «MovaVieda» i «Mova.tut» — u kožnych kursaŭ svoj słuchač:
«Kali ja zaprašaju svaich znajomych na kursy «Mova ź Imbrykam», to ja razumieju, što na inšych kursach ich niešta nie zadavalniała — ci plan navučańnia, ci čas zaniatkaŭ. Dyj ja pierakanany, što dla vializnaha Miensku jašče adny kursy biełaruskaj movy lišnimi nia buduć».
Kursy «Mova ź Imbrykam» buduć adbyvacca:
Miensk — štoaŭtorak, 20.00, Artsiadziba (pr. Niezaležnaści, d.58, ofis 430).
Vilnia — štosubotu, a 17.00, u Domie nacyjanalnych mienšaściaŭ (vuł. Rauhikłas, 25).
Viadučy kursaŭ — Aleś Mazanik.
