 |
Na biełaruska‑rasiejskaj miažy adnaviłasia afarmleńnie časovaha ŭvozu lehkavych aŭtamabilaŭ dla hramadzian Biełarusi. Za dakumenty treba płacić hrošy.
Ad učorašniaha dnia rasiejskija mytniki biaruć płatu za rehistracyju dakumentaŭ ź biełarusaŭ, jakija kirujucca ŭ Rasieju. U suviazi z hetym prastoi ŭ čerhach na biełaruska‑rasiejskaj miažy składajuć 3—4 hadziny.
Aršanski pradprymalnik Siarhiej Antonienka byŭ niepryjemna ździŭleny, kali pa darozie ŭ Smalensk ubačyŭ čarhu ź lehkavych i hruzavych aŭtamabilaŭ ź biełaruskimi rehistracyjnymi numarami, jakija vystrailisia na podstupach da «prazrystaj» biełaruska‑rasiejskaj miažy. Kali dahetul pracedura časovaha ŭvozu raspaŭsiudžvałasia vyklučna na hruzavy transpart, to ad siońnia afarmlać jaho abaviazkova i dla ŭładalnikaŭ pryvatnych aŭtamabilaŭ:
— Heta było poŭnaj niečakanaściu. Zahaniajuć na stajanku — i dalej idzieš, afarmlaješ časovy ŭvoz. Čarha vializnaja, bo dla ŭsich ahulnaja — tut i hruzaviki, i lehkaviki, kiroŭcy ŭsie razam stajać. Na centralnym pierajeździe «Krasnaja horka» z rasiejskaha boku dakumenty prymajuć tolki try čałavieki. Nu i, adpaviedna, čarha, kab aformić. Bo fur, samo saboj, vielmi šmat: jakraz ciapier astatnija darohi pierakrytyja dla ruchu ciažkoha transpartu i ŭsie chodziać praz centralnyja pierachody.
— Ale tyčycca heta tolki biełarusaŭ?
— Tak, biełarusaŭ. Rasiejcy prajaždžajuć volna, bo afarmlaje ž dakumenty rasiejskaja mytnia. Heta afarmleńnie časovaha ŭvozu transpartu: zapaŭniaješ deklaracyju, u jakuju ŭpisvaješ transpart, numar mašyny, ruchavika, kuzava. A kali vyjaždžaješ — hetuju papierku zdaješ. I ciaham 15 dzion musiš vyjechać nazad. Kali praterminavaŭ, to jak minimum — štraf. Ale mohuć zahnać na štrafnuju placoŭku, padać u sud, i sprava — ažno da kanfiskacyi. U rasiejcaŭ heta surova, kali praterminavaŭ časovy ŭvoz. Tam naŭprost zapisana: maješ prava ŭjechać, ale biaz prava prodažu, pieradaviervańnia i h.d.
Akramia času — jak kaža moj surazmoŭca, jon adstajaŭ u čarzie bolš za try hadziny — afarmleńnie patrabuje i hrošaj. 250 rasiejskich rubloŭ za rehistracyju plus 50 rubloŭ — za kamputarnyja pasłuhi. Razam — bolš za 10 dalaraŭ.
Varta ŭzhadać, što na pačatku minułaha hodu Federalnaja mytnaja słužba Rasiei ŭžo ŭvodziła afarmleńnie časovaha ŭvozu lehkavoha aŭtatranspartu dla hramadzianaŭ Biełarusi. Ale ŭ vyniku pieramovaŭ pamiž kiraŭnikami mytnych viedamstvaŭ praz dva tydni praceduru skasavali, i bolš za hod biełarusy jeździli ŭ Rasieju biez šmathadzinnych vymušanych prastojaŭ na miažy.
U presavaj słužbie Dziaržaŭnaha mytnaha kamitetu Biełarusi skazali, što nijakich papiaredžańniaŭ pra pačatak pracedury afarmleńnia časovaha ŭvozu lehkavoha aŭtatranspartu dla hramadzianaŭ Biełarusi z boku Federalnaj mytnaj słužby Rasiei nie atrymlivali.
U svaju čarhu, presavy sakratar Smalenskaj mytni Ŭładzimier Safonaŭ fakt prastoju biełaruskaha aŭtatranspartu na ŭčastku biełaruska‑rasiejskaj miažy paćvierdziŭ, ale admoviŭsia patłumačyć, čym vyklikanaje viartańnie da rehistracyi transpartu ź biełaruskimi numarami. Ź inšych krynicaŭ stała viadoma, što 27 sakavika 2008 hodu Federalnaja mytnaja słužba Rasiei admysłovym listom skasavała dziejańnie svajho ž lista ad 6 krasavika 2007 hodu, jakim i była prypynienaja pracedura afarmleńnia aŭtatranspartu.
