HUBEZ MUS spyniła na AAT «BiełAZ» dziejnaść złačynnaj hrupy, što na praciahu doŭhaha času vykradała tavarna-materyjalnyja kaštoŭnaści ŭ asabliva bujnym pamiery. U dačynieńni da byłych rabotnikaŭ zavoda i dziejnych słužbovych asob upraŭleńnie Śledčaha kamiteta pa Minskaj vobłaści raspačało šerah kryminalnych spraŭ, paviedamiła 5 lutaha pres-słužba MUS.
HUBEZ praviało analiz cieniavoha rynku realizacyi zapasnych častak, vuzłoŭ i ahrehataŭ da aŭtamabilnaj i karjernaj techniki, jaki dziejničaje na terytoryi Biełarusi i Rasii. Zhodna z apieratyŭnymi źviestkami MUS, ahulnyja cieniavyja abaroty ad realizacyi vykradzienych zapčastak vytvorčaści AAT «BiełAZ» składajuć da 1 młn dołaraŭ ZŠA ŭ hod.
Z pačatku 2015 hoda «praviedzienaja vielizarnaja karpatlivaja praca» pa praviercy apieratyŭnaj infarmacyi ab kradziažach tavarna-materyjalnych kaštoŭnaściaŭ, što ŭčyniajucca na pradpryjemstvie.
Apieratyŭniki vyjavili złačynnuju schiemu kradziažu kamplektavalnych, zapčastak da aŭtamabilnaj i karjernaj technicy, ustanavili kanały zbytu i lehalizacyi vykradzienych tavarna-materyjalnych kaštoŭnaściaŭ z vykarystańniem fiktyŭnych dakumientaŭ.
Na zavodzie dziejničała arhanizavanaja złačynnaja hrupa, u skład jakoj uvachodzili byłyja i dziejnyja rabotniki AAT, u tym liku asoby, abaviazkam jakich źjaŭlałasia zabieśpiačeńnie zachavanaści TMK i ich ulik. Pamiž udzielnikami hrupy byli dakładna raźmierkavanyja roli: adny z vykarystańniem padjomnych miechanizmaŭ ažyćciaŭlali padrychtoŭku i pahruzku zapčastak (asobnyja vahoj bolš za 800 kh), inšyja z vykarystańniem arandavanaha hruzavoha aŭtatranspartu vyvozili vykradzienaje z achoŭnaj terytoryi, trecija zabiaśpiečvali bieśpieraškodnaje i svabodnaje pierasoŭvańnie hruzu, dostup na terytoryju zavoda pabočnych asob i hruzavoj techniki.
Była stvoranaja hrupa achovy, jakaja vystaŭlała pasty ź videanazirańniem na adlehłaści da niekalkich kiłamietraŭ. Pracavali złamyśniki vyklučna ŭ načny čas vychadnoha dnia, dla suviazi vykarystoŭvali radyjostancyi i mabilnyja telefony sa źmiennymi sim-kartami.
Vykradzienuju majomaść jany vyvozili ŭ zahadzia padrychtavanyja časovyja składy — «adstojniki», raźmieščanyja na padvorku pryvatnaha doma adnoj ź viosak niepadalok ad Žodzina, adkul pa fiktyŭnych dakumientach zbyvali ŭ Rasiju.
Pieršuju apieracyju pa zatrymańni najbolš aktyŭnych udzielnikaŭ złačynnaj hrupy supracoŭniki HUBEZ MUS praviali pry padtrymcy śpiecpadraździaleńnia «Ałmaz» u listapadzie 2015 hoda. U momant razhruzki ŭ «adstojniku» na miescy złačynstva zatrymali šaściarych vykradalnikaŭ detalaŭ. Złačyncy «akazali tady aktyŭny supraciŭ, dziejničali dziorzka». Kinuŭšy hruz bolš jak na 600 młn rubloŭ, jany sprabavali uciačy na aŭtamabili «BMV Ch5», jaki ich supravadžaŭ, prataraniŭšy milicejski transpart. Dla spynieńnia transpartnaha srodku i zatrymańnia złačyncaŭ vykarystoŭvałasia zbroja.
Krychu paźniej zatrymali jašče adnaho ŭdzielnika złačynnaj hrupy, a «litaralna dniami» zatrymanyja jašče dvoje padazravanych — rabotniki BiełAZa.
Upraŭleńniem SK pa Minskaj vobłaści na padstavie analizu materyjałaŭ pravierki, praviedzienaj supracoŭnikami HUBEZ MUS, pryniataje rašeńnie ab raspačynańni kryminalnaj spravy ŭ dačynieńni da hrupy asob, što vykradali majomaść AAT «BiełAZ». Ich dziejańni kvalifikavanyja śledstvam na padstavie č. 4 art. 205 Kryminalnaha kodeksa (kradziež, učynieny hrupaj asob, u asabliva bujnym pamiery).
Fihurantami kryminalnaj spravy źjaŭlajucca dzieviać čałaviek. Siemiarym padazravanym vystaŭlenaje abvinavačańnie, u dačynieńni da ich prymienienaja miera strymańnia ŭ vyhladzie zaklučeńnia pad vartu. Astatnija znachodziacca ŭ statusie padazravanych.
Vykradzienaja pradukcyja vyjaŭlenaja i viernutaja pradpryjemstvu.
Zaraz śpiecyjalisty pravodziać invientaryzacyju, vyniki jakoj buduć dałučanyja da materyjałaŭ kryminalnaj spravy. Śledstva vyvučaje dakumientacyju, jakaja tyčycca miechanizmu ŭliku i kantrolu ruchu detalaŭ na pradpryjemstvie.
Padčas vobyskaŭ kanfiskavanyja mabilnyja telefony z roznymi sim-kartami, transpartny srodak i inšyja rečavyja dokazy, jakija vykarystoŭvalisia pry ažyćciaŭleńni supraćpraŭnaj dziejnaści. Pryznačany šerah kryminalistyčnych ekśpiertyz. Na majomaść padślednych nakładzieny aryšt. Rasśledavańnie praciahvajecca.
Za apošnija hady na pradpryjemstvie praviedzienyja šerah invientaryzacyj, vyjaŭlenyja niaznačnyja sumy niastačy, a ŭžo paśla inicyjavańnia HUBEZ MUS novych pravierak revizory na pačatkovym etapie vyjavili 1,5 młrd. rubloŭ škody, naniesienaj pradpryjemstvu. Pavodle infarmacyi HUBEZ, kančatkovaja suma škody «moža być u razy vyšejšaj».
Akramia taho, adnačasova z raspracoŭkaj hetaj złačynnaj hrupy supracoŭniki HUBEZ MUS sumiesna z revizorami Kamiteta dziaržkantrolu pravodzili kompleks pravieračnych mierapryjemstvaŭ u dačynieńni da słužbovych asob AAT «BiełAZ-Servis» — strukturnaha padraździaleńnia chołdynha AAT «BiełAZ».
Ustanoŭlena, što dyrektar AAT «BiełAZ-Servis», dziejničajučy z asabistaj zacikaŭlenaści, arhanizavaŭ kamiercyjnuju dziejnaść afilavanych struktur, dzie rabotnikami źjaŭlalisia jaho svajaki i blizkija siabry. Na praciahu dvuch apošnich hadoŭ padazravany, vykarystoŭvajučy svaje słužbovyja paŭnamoctvy, biez praviadzieńnia ŭstanoŭlenaj kankurentnaj pracedury zakupki, «pa vidavočna zavyšanych cenach» arhanizavaŭ zakupku, ramont i pastaŭku zapasnych častak da karjernaj techniki za košt ułasnych srodkaŭ AAT praz kamiercyjnyja struktury.
U vyniku niepravamiernych dziejańniaŭ słužbovaj asoby pradpryjemstvu naniesieny ŭron amal na 1 młrd. rubloŭ. U adnosinach da kiraŭnika AAT «BiełAZ-Servis» za złoŭžyvańnie słužbovymi paŭnamoctvami raspačataja sprava na padstavie č. 3 art. 424 KK. Padazravany adchileny ad pasady.
Za kradziež u asabliva bujnym pamiery, učynieny ŭ składzie arhanizavanaj hrupy, praduhledžanaje pakarańnie ŭ vyhladzie pazbaŭleńnia voli ad 3 da 12 hadoŭ z kanfiskacyjaj majomaści, a za złoŭžyvańnie słužbovymi paŭnamoctvami — u vyhladzie pazbaŭleńnia voli ad 3 da 10 hadoŭ z kanfiskacyjaj majomaści i pazbaŭleńniem prava zajmacca peŭnaj dziejnaściu.
